تمام بالنسبة للأداء
بعد ضبط المكنه و الفتيس و الكارونة
هتضبط الكربراتير عند الأسطى معتز المصرى - فى دار السلام, ده عبقرى كربراتير عن تجربة و بيشتغل الأكس و الباب بنفسة عالمخرطة و المقاسات عالشعرة.
كربراتير
======
بيانات البشمهندس معتز المصرى
تليفون:01222648701
العنوان :12ش زهير العتال من مصر حلوان الزراعى بجوار الشبراويشى وامام كشرى كهرمان - دار السلام
من الكورنيش, هتدخل فى الشارع إللى بين المحكمة الدستورية و مستشفى القوات المسلحة ( مدخل موقف المطبعة) و آخر الشارع هتدخل شمال فى الشارع الزراعى لحد متلاقى محل "ألبان رزة" على شمالك, قبل شركة الشبراويشى, تدخل الشارع اللى قدامه يمين هتلاقى الورشة (عالم الكربراتير)
|
و تركب اسبراتير الكترونى لادا أصلى من عند محمد طلبه. هتحس بفرق أداء و نعومة حاجه تانية
و تشوف كل شغل السمكرة المطلوبه بس تسأل أفضل سمكرى ميقولكش غير رفرف و نزل طبله و هات باب و الكلام العبيط ده, السمكرى الصح تجيبله علبه سمنه دايس عليها قطار يرجعهالك زى مكانت من غير متغير حاجه.
بالنسبة للدوكو تسأل سواقين التاكسى على أفضل صنايعى قريب منك و تتفق معاه على الألوان (فى ناس بتعمل لونين داخلين فى بعض غامق من تحت و فاتح من فوق لنفس اللون خطير) و متنساش يرشهالك شيشلوك (بلاك) من تحت و العتب و الكارتيرات علشان الصدأ بتاع الشتاء.
و بردوا تتفق معاه على اللون (عادة أو ميتالك) و نوعه و الفرن هتفضل جواه أد إيه, و حاول تكتب أدامه الكلام ده علشان الناس دى بترجع فى كلامها بسهوله.
يا ريت السمكرى ميكونش عارف بتاع الدوكو, و لو متخانقين مع بعض يبقى أفضل (هيتلككو لبعض عالشغل و أنت حاجتك تتضبط صح)
بس المهم تتطمئن عالأساسيات زى مقولتلك
أعانك الله