الموضوع
:
اغيثونا يا ولاد البندر فى جوان وش السلندر
عرض مشاركة واحدة
#
1
11-10-2014, 01:36 AM
AbOnOrA
Aِِbo(Nora&Islam&Judy)
Wael Magdy Salah
من انا؟: ابو نورا واسلام
التخصص العملى: IT Consultant
هواياتي: Computers, Automotives
تاريخ التسجيل: May 2008
الموقع: ام الدنيا مصر
المشاركات: 17,066
اغيثونا يا ولاد البندر فى جوان وش السلندر
اغيثونا يا ولاد البندر فى جوان وش السندر
حكايتى مع اصلاح مشكلة جوان وش السندر وسخونة العربية
من تأفيزة الجزمة والشراب لاسعار قطع الغيار والمصنعيات والحساب
اصحابى واهلى وخلااااااااانى انا عايز اخودكو فى احضااااااااانى
واعيييييييييييييييييييييي يط
وحشتونى جميعاً ووحشتنى لذة كتابة المواضيع والحكاوى
وانا كنت ناوى فى العيد ده اقضيه كله معاكو على المنتدى ومجهزلكو مواضيع وتجارب وحاجات كتير بس قدر الله وماشاء فعل والعربيه قبل العيد باسبوع عملتها معايا وجابت جوان وش سلندر ولقيت نفسى قدامى حكاية تانية جديدة لسه بتبدى
الحكاية كلها بدات قبل العيد باسبوع كدة او عشر ايام اذ فجاءة لقيت العربيه سخنت
العربيه : ديهاتسو تريوس - اللى هى برضو التويوتا راش toyota rush
نزلت اتعاملت معاها وكملت المشوار وبعدها بدات الاحظ اثار الطحينة فى المية الاول وبعدين فى الزيت
يعنى جوان رسمى فهمى نظمى وشغلانة وداخل عليا عيد
تعمل ايه يا عبد الرحيم تعمل ايه يا عبد رحيم
قولت اركن العربيه على كدة واعدى يومين زحمة العيد دول وبعد العيد فى الروقان ابقى اشوف اللى فيها
ونصيحة لاى حد فى موقف مشابه انه يعمل كدة علشان يترحم من زحمة المواصلات (زحمة عيد ومن غير عربية ) مابين الورش وقطع الغيار والانتهازيين بيبقى ده موسم بالنسبالهم
والاهم انه يستلم براحته ويجرب براحته ولو فيه حاجة يرجع تانى يعملها براحة راحته لكن الصربعة
والتسرع ده عمرة ما يساعد فى حل مشكلة كبيرة فى العربيه زى كدة وغالباً هتلبس زى ما حصل معايا
نرجع لموضوعنا وحكاية الجوان وياترى ايه السبب فى السخونية والجوان وطبعاً زى اى مصرموتورزاوى قديم كان لازم ابداء احكى واخد اراء الزملاء فاحد الزملاء صاحب مركز خدمة عرض على اعمل العربيه عندة ونلمها قبل العيد وقالى الموضوع مش مستاهل ومش هياخد اكتر من يوم شغل والتكاليف هتتلم والدنيا فى منتهى البساطة
شكرته طبعاً وكلامة خلانى افكر تانى
لسه فاضل اسبوع على العيد ولو الموضوع اتلم فى يوم وفى مركز تبعنا كمان يبقى زى الفل كدة هعوز ايه تانى
بس فيه مشكلة ديه تريوس مش كيا برايد ولا دوجان يعنى حل المكنة حوار برضو ومش اى ميكانيكى يشتغل فيها فاتصل بصديقى تانى وسالته عن مدى تمكن وخبرة الميكانيكى بتاعة
تررررن ترررررررن الو ايه يا باشا ايه الاخبار .. تمام الحمد لله .. معلش سؤال قبيح يا باشا .. اتفضل يا باشا قبح براحتك .. الا الميكانيكى اللى حداكو ده بيفهم ولامؤاخذة ولا اجيب الميكانيكى بتاعى معايا
قالى عيب عليك ده ميكانيكى بريمو ولا على قديمو ده حتى لسه من يومين كان حالل مكنة تريوس اخت بتاعتك بس وموديل 2012 بالأمارة عملها عمرة كاملة
قولت يافرج الله كدة مفيش مجال للشك وظهر الحق انا هخلص مشاويرى والتزاماتى وافضى نفسى قبل العيد بيومين اروح اعملها وتبقى مشكلة واتحلت وغمة وانزاحت
ونترحم من التاكسى والانتظار على النواصى
بس معلش سؤال وقح اخير .. بالنسبة للكاشات يعنى ايه ظروفها
لحسن اخوك لسه طالع من مدارس وداخل على عيد
قالى ولا تحط فى دماغك وده مكانك وهنا عنوانك واثبت مكانك وكل الحاجات الحلوة الجميلة اللى بتطمن ديه وتثبت ديه والحقيقية انا اتثبت
ماشى يا عم الحج خلاص هيجبلكو العربيه نعملها قبل العيد
وهنا احب انصح كل شاب برىء زى حالاتى انه ميتكسفش ابداء من الاسئلة الوقحة والقبيحة ديه كلها ولازم يسالها وياخد عقاد نافع قبل الكوريك ما يقع فى الراس
معلش طولت عليكم ولسه هطول بصراحة علشان انا ناوى احكيلكو كل الحكاية من تأفيزة الجزمة والشراب لقطع الغيار والمصنعيات والحساب فاللى وراه حاجة يروح يعملها واللى موراهوش يقوم يعمل كوباية شاية ويجى يكمل الموضوع بعد الفاصل
__________________
اخر موضوعاتى
قريباً تقرير وتجربة اداء دايهاتسو تريوس * تويوتا راش
التعديل الأخير تم بواسطة AbOnOrA ; 11-10-2014 الساعة
01:44 AM
AbOnOrA
مشاهدة ملفه الشخصي
إرسال رسالة خاصة إلى AbOnOrA
زيارة موقع العضو AbOnOrA!
البحث عن المشاركات التي كتبها AbOnOrA