بعد اللادا ممكن نركب أيه....؟
السلام عليكم
هو الموضوع قد يبدو غريب شوية لإن من اللحظة الأولى لطرح السؤال هتكون الإجابه... أى عربية أحسن من اللادا
أنا عارف أنها أرخم عربية ممكن ترهق الواحد فى سواقتها. و مشاكلها لا تنتهى
بس بأستغرب ساعات لما ألاقى واحد كان معاه لادا و حدث و جاب لادا تانى !!!!
- صحيح عربية الميكروباصات تخاف ترمى عليها فى الطريق, و قطع غيارها رخيصة (و مش معمرة طبعاً) و صيانتها سهله, بس أنسى الرفاهية مهما حاولت تعمل.
- دركسيون ثقيل فى تصميمه (سواء 3 بلية - 5 بلية - هاف باور...) و فيه نسبة بوش زياده و نص قطر دورانه كبير (لو يوتيرن ضيق لازم تأخده على كذا مرة)
- عفشة دوبل, يعنى مشاكل دوبل و مصاريف دوبل (4 بيض مقصات - 4 مقصات - 8 جلب مقصات .....) كله ضعف العربيات الأخرى. بالإضافة لكاوتشات الميزان المضروبه اللى ممكن تغيرها مع كل تربيط عفشة (كل شهر و نص - شهرين)
- مكنه صوتها عالى و سحبها ضعيف , يستحيل ضبط الرعشة اللى فيها سواء بإسبراتير عادى أو الكترونى, بالإضافه لكربراتير مشاكله كتير جداً
دى معظم المشاكل اللى ممكن تخليك تكره اللادا (علاوه على الشكل بس للأمانه الشكل فى الفئة السعرية دى مش بيختلف أوى عن باقى العربيات - بأتكلم عن المستعمل طبعاً)
طيب ايه اللى مصبرنا عليها ؟. - على أد لحافك مد رجليك.
بس لاحظت إن قطع الغيار فى الدايو اللانوس و الأكسنت القديمة و الأكسيل و .... سعرها متقارب جداً مع اللادا, طيب أيه اللى يخلينى أركب لادا لو معايا ثمن اللانوس أو الأكسنت, و طبعاً عيوب أقل و رفاهيات أكتر.
محتاج أتناقش مع حد فى الكلام ده و يدينى رأيه بموضوعية
أنا مش ناوى أغير دلوقتى - حين ميسرة يعنى - بس عاوز أعرف ممكن يكون فى نيه و لا أخلينى زى ما أنا
(يعنى عاوز أعرف عيوب العربيات دى) خاصة إن الميكانيكا بتاعتها أكيد مختلفة شوية عن اللادا, هل ممكن أتعامل معاها, و بنفس التكاليف تقريباً, و لا الموضوع واسع شوية.
جزاكم الله خيراً
__________________
|