أكيد فى فرق بين الـ 127 و اللادا
أولاً فى الحجم, أكيد اللادا أكبر و أوسع من الداخل و ليها شنطة كبيرة
ثانياً العيوب
الإثنين عربيات قديمة و هتلاقى قطع غيارهم بسهوله بس الأكيد إنها مضروبه, يعنى لو غيرت قطعة غيار جديده و رجعت غيرتها تانى بعد أسبوع, عادى , بس على أد لحافك زى مبيقولوا
الـ127 غالباً بتمسك بارومة من عند الكارتيرة و كل شوية تروح تلحمها عند السمكرى علشان المطبات بتفتح الشاسية (بيبقى فيه شروخ خفيفة أو تنميل), و مع كتر القص و اللحام أبعاد العربية بتختلف عن الأصل و تلاقيها بتحدف على ناحية معينه (يمين أو شمال) - الكلام ده موجود فى الـ 128 و الـ 127 و الريتمو, بس الـ 127 أقلهم
ده اللى اعرفه عنها و يفيدك أكتر أحد ملاك العربية
اللادا عربية ناشفة و حمالة أسية و فى الطرق المصرية المكسرة مينفعش غير حاجه حجرية كده
بس هتلاقى العفشة بتاعتها مزدوجه و بالتالى محتاجه عناية أكتر, تربيط و تشحيم و ... و خاصة بيض المقصات
صوت المكنه عالى شوية و ده مالوش حل, ممكن ضبط التاكيهات يوطيه شوية
السخونه ليها مليون حل, بتوع التاكسى أبتكروه, و الحال ماشى
الدركسيون تقيل شوية و ده بيركب له مناول على رولمان بلى بـ 75 ج و بيبقى أخف بكتير
الدواسات (بنزين-فرامل-دبرياج) ممكن تكون ناشفه شوية بس مع الوقت هتتعود (ممكن يجيلك شد عضل فى الأول بس, بعد كده هيطلعلك باى و تراى و ترابيس بس فى السمانه
)
مميزاتهم (الـ 127 و اللادا):
- قطع غيار عند البقال بمعنى الكلمه, يعنى مش هتدوخ على حاجتها زى أصحاب العربيات الغير منتشرة
- صيانتها سهله, برضوا مش محتاجه عبقرى إلا فى حالات نادرة أوى, و سهل تتعلم فيها بنفسك (تمشيها مؤقتاً يعنى)
- الـ 127 موفرة فى البنزين (و بنزين 80 كمان) عن اللادا
- اللادا ممكن تنقل فيها حاجات أكتر و أتقل من الـ 127
- نصيحتى:
لو عرفت تقع على 131 نضيفة تبقى أحسن
أو مازدا 323 لو أنت من سكان القاهرة (علشان قطع غيارها نادرة فى المحافظات)
و فى خيارات كتير فى نفس حدود المبلغ ده
أعانك الله