السلام عليكم اخوانى الاعزاء كنت احب اضيف تجربتى مع مشكله (عويصه) فى سيارتى الحاليه دايو لانوس 2008 وبحكم تجارتى فى السيارات اتعلمت الصبر على اى مشكله فى السياره خصوصا لو
مشكله غريبه وملهاش حل .
باختصار العربيه كان فيها مشكلتين
اولا : الRBM بيعلق كتير على 1.5
ثانيا : المراوح احيانا مش بتشتغل الا مع التكييف فقط (لما اشغل التكييف تشتغل غير كدا لا)
وعملت فى العربيه كل حاجه من ميكانيكا لكشف كمبيوتر وتغيير حساس المياه وتغيير حساس الايدل وحساس ال TBS وكشف كهرباء على العربيه بالكاااااامل وتغيير برده العربيه (الكمبيوتر) ودائما النتيجه (عربيتك سليمه يا باشا و100 %) .
طيب انا كنت بكلم نفسى واكتر من مره عداد الحراره يوصل الاحمر داخل البلد واول ما اشغل التكييف مراوح التكييف تشتغل والحراره تنزل وفكرت ابيع العربيه رغم انى جايبها للتجاره وهخسر فيها بس قولت حرام هروح من ربنا فين انى (البسها ) لحد غيرى كده كده لازم تتصلح الاول ومكنش قدامى غير التوكيل (وما ادراك ما التوكيل) خدمه محترمه اه بس غير غير غير و ادفع ادفع ادفع .
والغريب ان العربيه حالتها ماشاء الله فوق الممتازه فعلا وده اللى كان هيجننى وكل حاجه سليمه مش عاوز اطول عليكم اكتر , بمعجزه واراده ربنا يكتشف الكهربائى الخبره ان كل اللى مجنن العربيه وكان هيولعها اكترمن مره (
فيشه ضفيره الكهرباء) فقط الكهربائى هزها المراوح اشتغلت وال RBM اتظبط .
وطلع كل ما فى الامر ان فيشه ضفيره العربيه داخلها شويه تراب و (ملمسه ) شويه فقط لا غير سبحان الله الامر اهيف من الهيافه بس جنن العربيه عشان كده حبيت اضيف الموضوع ده عشان غيرى يستفيد باذن الله
انا سرفت فى الموضوع ده 1400ج تقريبا
وتعبت شهرين كاملين بس الحمد لله اتعلمت حاجه جديده .
انا هرفق صور لزياده التوضيح وهضع دائره حمراء حول المكان (فيشه الضفيره) ورجاء خاص من اصحاب اللانوس تغطيه فيشه الضفيره بكيس او اى عازل والاهتمام بنظافته لان للاسف التقفيل المصرى عامل غلطه (من وجهه نظرى) ان الفيشه تحتها فتحه فى الكرتيره اليمين الفرده الاماميه يمين تجعل من السهل دخول التراب على الفيشه واسف مره اخرى للاطاله والله الموفق والمستعان