[ليالينا]

اول امبارح نويت اروح للميكانيكي علشان يشيك علي العربيه خاصة اني لسا جيباها وماكنش فيه ميكانيكي معايا مجرد حد معرفه كدا شافها وساقها وخلاص

انا كنت رايحه اغير فلتر الزيت والزيت وخلاص لئيته قالي دي هتحتاج شغل جااامد وهو ثقه بالمناسبه وعارفينه من زمان يعني بتاع العيله كدا ، المهم جبتله الاتي :-
( واللي عاوز يعرف الاسعار )

تيل فرامل خلفي 2 60 جنيه
علبة زيت باكن 13 جنيه
مسطر خلف 2 40 جنيه
طقم بوجيهات 40 جنيه
فلتر بنزين 5 جنيه
فلتر زيت 15 جنيه
ابلاتين وكوندنسر 5 جنيه

وقبلهم كنت جايبه زيت اللي هو بيتغير كل 3000 كيلو
وقالي ان الشكمان محتاج يتلحم العلبه اللي وراه وفعلا روحت لحمته بعدها
وقال كمان ان المساعدين قدام لغيرهم علشان اليمين جايب زيت هو قال كدا وانا شاكه اني السبب لاني خت مطب جامد اووي

المهم غير الحاجات دي كلها ولسا هتروح للكهربائي


ايه رايكم في الكلام دا
= تقيييم العربيه كدا كويس ولا تعتبر ايه اصل انا جيباها ب 15 وصاحبها قالي دي حاجات مش تعيبها دا بيتغير دوري وباستمرار ...

=المساعدين قالي تجيبهم صيني او ايطالي مش هتفرق المهم المطبات ، ايه رايكم اصل انا اعتقد ان الايطالي تستحمل اكتر ولا مفيش حاجه من دي الاتنين زي بعض .

=البطاريه سايله مش جافه لازم اغيرها صحيح قبل دخول الشتا ولا طالما ماشيه خلاص

=انا بنزل بيها ايام الاجازات فقط جمعه سبت وممكن يوم في وسط الاسبوع مش دائم يعني ...

= اغير علبة الشكمان ولا تمشي وهي ملحومه كدا ...

=لما بزود السرعه عن 60 بحسها مش ثابته وبخاف هل دا لاني جديده ولا دا الطبيعي في ال 127 ولا ايه ...