[مغربى]

عمرو حسن:

بخصوص موضوع التقشف ده

بعيدا عن التهريج ... الموضوع ده رهيب فعلا - مجرد انه الفكرة تخطر على بال مسؤول - أو يتهيألوا انها مقبولة أو قابلة للتطبيق - أو حتى الطرح والنظر فيها .. عارفين ليه؟

انا عشت برة مصر وأقدر أقارن - الشعب المصري متقشف بدرجة كبيرة - فيه حاجات غريبة بنعملها في مصر ما بتتعملش غير عندنا

• بداية من الناس اللي بتربّي طيور على بقايا طعامها

• وصولا للعربيات موديل السبعينات اللي السمكري بقى حافظها حتة حتة ومربيها على ايديه

• و الراجل بتاع الرّفة " رفة الملابس "

• و الجزار اللي بيبيع عضم ..

• والفرارجي اللي بيبيع رجلين فراخ

• حاجات هنا بتترمي في الزبالة - في مصر بيتجهز بيها عروسة

• في المدارس وصلنا ل140 طالب في الفصل هنا 18 بس والفصل مكيف

• تعرفوا ان في مصر الصفيح اللي بيترمي في الزبالة بيتجمع ويتعبى عسل أسود!!

• مصانع بتعيد تدوير سرنجات الأدوية وبتتباع منها علشان سعرها أرخص

• الناس اللي بتروح تفاصل في سعر الدواء - وتضطر تآخده شريط بشريط يمكن ربنا يفرجها وتوفر تمن الشريط التاني قبل ما ينتهي الأولاني

• فيه ناس ما بقيتش بتشتري لعيالها اللبس الا في الأعياد - دلوقتي في أطفال عندها عيدين - عيد اللبس وعيد اللحمة " لا يجتمعان "

• ناس بتضطر تنتظر سرير يفضى ودورها ييجي بعد تلات شهور وتستحمل الألم والمرض علشان ممعهاش ..

الواحد يقول ايه ولا ايـــــه ولا ايـــــــــــــــــــــــ ه

وييجي بسلامته ويقولك تقشّف

حسبنا الله ونعم الوكيل