ربنا يسهل وأفيدك
بص يا سيدي قدامك طريقين: أولا من وسط البلد وده لو انتا رايح يوم الجمعة الصبح في حدود 10 صباحا ممتاز.
هتاخد شارع الهرم لأوله عند النفق ثم الكوبري وتنزل شارع الجامعة لآخره وبعدين يمين في شمال وتطلع كوبري الدقي تنزل منه على طول تطلع أكتوبر.
تفضل ماشي على كوبري أكتوبر لآخره هيوصلك مدينة نصر... في نهاية الكوبري هتلاقي ثلاث مخارج انزل من اللي في النص وبرضه خليك على طول هتلاقي الشارع في آخره إجباري يمين في شمال ... معاه ومتسيبهوش
طبعا الطريق مش قصير هتمشي شويه كمان هتلاقي كوبري في شمال الطريق مكتوب عليه محور المشير القاهرة الجديدة اطلع الكوبري وبعد ما تنزل هتلاقي قدامك بشويه مش كتير ملف تاخده وتحضن يمين. هتلاقي مدخل اليافطة بتاعته مدينة نصر. الوفاء والأمل. ادخل فيه .... مشينا كتير بس خلاص قربنا. خلي بالك من المداخل اللي على يمينك بعد مدخل الطوب الرملي اللي قدامه يافطة بتوضحه هتلاقي كابلات كهرباء ضخمة المدخل اللي بعدها يدخلك عند السوق بس من ورا. انا عن نفسي بروح من هناك عشان الزحمة مبحبش أدخل حسين داكر اللي هوا الزحمة كلها يوم السوق.
دا أول طريق.
التاني من الدائري... نسمي الله ونبتدي من جديد. هتطلع الدائري اللي رايح المنيب والمعادي. تفضل ماشي فيه لحد ما توصل بعد زهراء المعادي وكارفور لمنزل طريق السخنة والقطامية. انزل منه وبعد المنزل هتلاقي ملف شمال الطريق على طول خده وبعدها هتلاقي شمالك على طول نفق بيمر من تحت الدائري ادخله هتطلع منه على صينية كمل على طول طريق طويل وفاضي إلى حد ما هتفضل ماشي لحد ما هيقابلك مدخل يمين بيعدي من تحت كوبري محور المشير اللي قلنا عليه في الطريق الأول ... ادخله وهنا هتبقى في نفس وصفة الطريق الأول.
أنا عارف إن الطريق طوييييييييييييييييييل بلاد تشيلك وبلاد تحطك. ويمكن الوصف مبين ده أكتر. بس معلش وربنا يوفقك وأرجو أن أكون أفدت.