السلام عليكم ورحمه الله وبركاته ..
مع احترامي التام للأعضاء واساتذة وخبراء المنتدى ..
مش معقولة كل ما حد يدخل يسأل عن ال 128 يلاقي سيل من التكريه والتنفير في العربية بالطريقه دي !! انا معاكم انها عربيه قديمه ومشاكلها كتير انما الاسلوب اللي دايما حضراتكم بتردوا بيه عن السائلين مستفز جدا مع احترامي لحضراتكم جميعا وخصوصا المخضرم .. مستر استرا .. اللي دايما بينه وبين العربيه دي تار ومحدش عارف ليه ؟!! ملحوظه : انا من مالكي هذه السيارة والحمد لله مرتاح جدا لاني مش مقصر معاها وكمان لما بقصر اصبحت مشاكلها بالنسبالي معروفة وانا بتعامل مع اشهر مهندس ميكانيكي في هذا المنتدي الكريم ومش بروحله غير كل فين وفين لدرجه ان الراجل افتكر اني هااااجرت .. ملحوظه اخيرة : الاسعار اللي حضراتكم بتقولوها عن الشاريد وهمييييه وخيالية جدا ولو قدامكم حاجه بالاسعار دي حقيقة ياريت تدلوا الراجل الغلبان اللي يسأل اللي انا متأكد انكم بعدتم عن استفساره كل البعد .. تحياتي للجميع
|
عليكم السلام ورحمة الله وبركتة
فى الحقيقة على اد ما خدت على خاطرى من الكام كلمة اللى قلتهم و بالذات على شخصى ....لكن صدقنى انا سعيد بيك
بفرح اوى لما بلاقى انسان معتز بحاجتة وحاببها
اهى على الاقل قيمة بقينا مفتقدينها اليومين دول فى حياتنا وبتفكرنا بالناس المحترمة اللى نادرا ما بنشوفها فى الحياة
اخى العزيز عاوزك تثق فى حاجة واحدة بس
كل كلمة بكتبها هنا يعلم الله انها لخالص وجهه الكريم
مش معقول يا اخى اسالك على عنوان وانت تكون عارفة ومتاكد منة وبعدين تدلنى على طريق خطا
انا اتشرف بانتمائى لمنتدى مصر موتورز اللى احبة كثيرا واحب اعضاؤة اكثر وبكون سعيد جدا وانا بتصفح محتوياته وبكون اسعد لو لقيت سؤال طاير كدة انا عارف اجابته
مش معنى انى اقول كلمة ضد عربية ان فى بينى وبينها حاجة ...يا عم دى شوية حديد
لو قرات ردودرى هتلاقينى كاتب انى جبت 5 عربيات 128
طب انت جبت 5 عربيات 28 ؟
يا عم بحبها والله لكن العربيات عموما اتظلمت من غش قطع الغيار
تركب الحاجة النهردة تبوظ بكرة
واللى بيركب ولا هو فاهم حاجة ولما يفوق من البرشام ابقى انت فهممه
الفكرة كلها ان العربية دى فعلا بتحتاج مجهود فى الصيانة سوا مادى او زهنى
مش عاوزك تزعل منى ولكن انا بكون حريص انى انقل تجربة مريت بيها وحابب انقلها لاحد من باب النصيحة
وفى الاخر راى مش ملزم لاحد
انا معايا عربية صينى وفرحان بيها اوى
ولو حد بس اتكلم فى حق الصينى بزعل جدا
بركبها وبنزل اركب السكودا او اى نوع اخر بفضل اقنع نفسي ان عربيتى احسن !!!!
طبعا انا غلطان لكن انا زيك بحاول احب الحاجة بتعتى عشان هى كمان تحبنى
بالنسبة لسعر الشاريد والله ما ضرب من الخيال زى ما قلت
انا كنت بشترى عربية من شهر للمدام عندى ودورت كتير والاسعار فعلا حقيقية
اسف للاطالة وباكد عليك مش عاوزك تزعل منى
سلام