زهقت من العربيات كلها بسبب الصنايعية و و و و....
السلام عليكم
مش عارف شعورى إيه بالضبط
بس عندى إحساس قوى أبيع العربيه و أبطل أخرج من البيت إلا للضرورة القصوى و لا زيارات و لا مناسبات و لا ... الشغل فقط لو فى شغل.
الصنايعية كلهم بلا إستثناء بقوا حاجه صعبه
أسعار المصنعية و قلة الخبرة و التجريب و التخريب كمان و قلة الضمير فى العمل.
الواحد عمال يحسبها شمال و يمين مش لاقى حل وسط
العربية رحمه من بهدلة المواصلات و خاصة مع الأسرة و الأطفال
بس فى نفس الوقت بهدله مع الصنايعية إللى لازم تصاحبهم و هما لازم يشتغلوك و ينصبوا عليك, بخلاف الزحمة و الشوارع المكسرة و رخامات الطريق....
مش بأتكلم عن موقف بعينه و لا صنايعى محدد
أنا براجع كل الصنايعية إللى إتعاملت معاهم من ساعة مركبت عربيه, مش قادر أفتكر حد بيتقى ربنا فينا.
واحد جارى و زميلى فى الشغل, لسه بايع عربيته و عمال يقول بجد كانت همّ و إنزاح, حسيت إن الموضوع مش إدمان و تعود و مش هتعرف تركب مواصلات تانى!!! زى الكلام الشائع يعنى.
حتى لما بقارن العربيات الجديدة , برضه التوكيلات نصابة و سرقه علنى إلا القليل النادر
يعنى الموضوع بقى زهق و قرف من العربيات كلها, جديد و مستعمل,كل الماركات اللى بتمشى على أرض مصر و بتتعامل مع صيانات صنايعية و مراكز مصر أياً كان مكانهم.
مش عارف أعمل إيه؟
حاله مؤقته و مرت على حد هنا قبل كده
و لا فعلاً الشعور صحيح و أعرض العربية للبيع زى زميلى و أقعد فى البيت و أرجع للمواصلات العامه تانى.
__________________
التعديل الأخير تم بواسطة zing0 ; 26-03-2014 الساعة 02:17 AM
|