رد: مشكله خطيره فى بيجو 301 ظهرت فى الجزائر
الموضوع بيتكلم عن مشكلة في "بكرة عمود الحدبات" .. أو بلغتنا في مصر.. "بكرة عمود الكامات" ودي هي البكرة اللي بيركب عليها سير التقسيمة علشان يشغل الصبابات.
طبعا .. هما ما قالوش طبيعة المشكلة ايه .. وربطوها بالسلامة وكده علشان تحبيش الخبر
أنا اتوقع إن المشكلة هي إن البكرة ممكن تخلي الكامات تخلف التقسيمة.. وبالتالي الموتور ممكن يقفش وما يشتغلش.. بس طبعا بعد حبة خساير مكلفة في البساتم والصبابات
علاقة الموضوع ده بالسلامة بييجي من ناحية إن الموتور بيشغل الباور والفرامل.. فلو الموتور طفى وانت سايق .. هتلاقي الدركسيون بقى تقيل والفرامل ضعيفة جدا.. وده معناه احتمال حوادث ممكن تكون مميتة لا قدر الله.
أحيانا.. الأخبار اللي زي دي بتبقى دعاية سلبية من منافسين في السوق.. بس الموضوع بيتكلم على بيجو وسيتروين مع بعض.. حضرتك عارف إن بيجو وسيتروين شركة واحدة في الأساس.. يعني المشكلة في التصنيع فعلا.
مش عارف بصراحة إيه وضع التوكيل هنا من ناحية المشاكل دي.. ومتهيألي الأحسن نشوف لو فيه أخبار تانية على النت في أماكن تانية في أوروبا عشان نتأكد من صحة الخبر.
|