الحقيقة الموضوع ده حصل معايا من عدة ايام فقلت احكيه لعل حد يستفيد منه . فى الاول وبينما بدخل السيارة الجراج سمعت صوت طقة فى الصاج كأن حاجة بتتكسر تحت العربية فنزلت وبصيت تحت العربية لكن مفيش اى حاجة , تانى يوم خرجت بيها الصبح لقيتها ماشية عادى لكن لاحظت حاجتين العربية بتحدف شمال مع الفرملة , كمان لقيت الدركسيون وانا ماشى مش فى وضعه الطبيعى . المهم عديت على واحد بتاع ضبط زوايا اعرفه عشان يبص على العربية لكنه قالى العربية تمام . المهم وانا راجع بليل لقيت صوت طقطقة ظهر وبعدين ابتدى يزيد ويادوب جت قدام البيت لقيتها وقفت ولاتتحرك للامام او الخلف مع صوت دربكة كأن فى حاجة بتتكسر فى الموتور . المهم الجيران تجمعوا وواحد منهم قالى دا كوبلن . زقتها بالعافية للجراج وتانى يوم احضرت ميكانيكى معرفة وشاطر بص عليه قالى دا الصليبة بتاع الكوبلن فرطت
ودى الصليبة
رحت اشتريت واحدة جديدة وكاوتشة جديدة ورحت ركبناها وبعد ماقفلنا ولسه بتحرك بالعربية لقيت صوت دربكة وراح الكوبلن خارج تانى . الميكانيكى نزل تحت العربية وهو مستغرب لكنه فوجئ بان الركبة اللى ماسكة الميزان مكسورة وهى دى السبب وانها لازم سمكرى شاطر اللى يعملها
تانى يوم طبعا شديت العربية لحد السمكرى واشتريت ركبة جديدة ودى صورة الركبة
وده الميزان
وابتدى السمكرى يفك القديمة باللمبة وبعدين يشيل الدايب اللى تحتها ثم قام بلحام الركبة الجديدة وطبعا لازم يراعى المقاسات . بعد كده اشتريت صليبة تانية لان الجديدة مقاسها مش مضبوط للاسف الاستعمال احسنوهى اللى ركبت وبتركب فى ثانية .
وبعد ماقفلنا الكوبلن طبعا زودت زيت الفتيس لانه كان وقع كله والحمد لله العربية بقت احسن من الاول
عاوز اقول كلمة اخيرة ان انا كنت زعلان اوى من العربية وان دى اول مرة اعمل حاجة فى العربية لكن لقيت ان اى عربية معرضة للحاجات دى