عملية نصب
الاخوة الافاضل انا عربيتى دايو لانوس 2008
كل الامور كانت ماشية تمام لغاية ما جيت يوم الصبح وانا رايح الشغل العربية قعدت تترج جامد وتبطل ومش عايزة تدور واحاول تدور وترجع تبطل لغاية ما ركنت وحاولت ادورها وادوس بنزين تطلع دخان اسود وترجع تبطل
المهم رحت لميكانيكى معرفوش بس متخصص فى الدايو راح حاططها على الجهاز وقالى ان الايديل عايز يتنظف وحساس الفخذة اليمين عايز يتغير وكانت لمبه التشك بتنور
وفعلاً غير الحاجات ديه والعربية مشيت بس بردوا عملت زى الاول لكن على فترات ابعد
المهم رحت لميكانيكى كان غيرلى طقم الدبرياج علشان يشوف ايه المشكلة راح مغير موبينة التكرير وقالى ب 300 جنيه ومش عارف ديه ايه نوعها بالضبط ده لو غيرها لأنى مش واثق فيه وقالى الكارته كان فيها أى سى بتاع الرشاشات عايز يتصلح وديه كمان ب 300 جنيه وفيشة الكارته مملحة وغيرها ب 80 جنيه ده غير مصنعية 400 جنيه .
العربية مشيت بس مش مظبوطة وتحس انها بتلم بسرعة بمجرد رفع رجلى من على البنزين وصوت الماتور عالى وساعات بيكون فيه رجه واحيانا بتبطل بس مش زى الاول بس الصراحة انا حسيت ان الميكانيكى ده نصب عليا ومش حاروح له تانى
هل ممكن يكون سبب ان العربية مش مظبوطة البوجيهات أو سلكها زى ما فى ناس قالولى ؟
فيه حاجة كمان معلش انا بتقل على الزملاء
انا من حوالى شهر دخل كيس نيلون ولف على الكوبلن اليمين وخلعه من الفتيس ورحت لميكانيكى ركبه تانى وكنت اليوم ده لسه ظابط زوايا وكل شئ تمام
بس من ساعة ما الميكانيكى ركب الكوبلن والعربية بقت بتحدف جامد والدريكسيون معوج والعفشجى قالى ان العربية محتاجة ظبط زوايا تانى علشان الكوبلن اتخلع واتركب
رحت نفس البنزينة وعملت ظبط زوايا بالليزر تانى ومفيش فايدة لا الدريكسيون اتعدل ولا العربية رجعت متحدفش
وروحت عملت ظبط زوايا تانى فى مركز خدمة محترم وبردوا بالليزر ومفيش فايدة لدرجة ان الفنى خرج معايا مرتين علشان نجرب العربية وكان مستغرب ان العربية على الكمبيوتر مظبوطة جداً لكن على الارض مش مظبوطة
فهل ممكن يكون تركيب الكوبلن فيه حاجة مش صح علشان كده الدريكسيون مش عايز يتعدل والعربية لسه بتحدف بالرغم من ظبط الزوايا أكثر من مرة ؟
معلش طولت عليكم بس ممكن حد يفيدنى
واسف على الازعاج
|