[احمد الجارحـي]

مساء الخير شباب




بقالي فترة بصراحة متابعكم في صمت حتي مسجلتش هنا في المنتدي و فضلت أني اتابع بصمت معاكم كلامكم و ارائكم و ردودكم لكن بصراحة كل شئ كان مشجع أني اسجل هنا و اشارك معاكم و استفسر منكم و اسألكم

و أسف للمقدمة الطويلة

الموضوع

انا عندي عربية 128 موديل 77 عندي شوية مشاكل فيها و أتمني اني استفاد بخبرتكم هنا

اول حاجة

حدث ولا حرج أن الموتور خفيف و للأسف بتطلع دخان أبيض من الشكمان و كمان من الموتور قدام و منظري ف الشارع مش ولابد
طبعاً ناس تقولي طقم شمبر و ناس تقولي عمرة و ناس تقولي سقط موتور إستيراد 1100 cc وناس تقولي سقط موتور 1300 cc و ناس تقولي سيبها لحد ما تجيب أجلها و غير و كلام كتير وانا بصراحة ف الميكانيكا ابيض يا ورد عشان مكدبش عليكم ده بالنسبة مشكلة الموتور أتمني أفضل الحلول و أرخص الاسعار عشان انا مشطب اووي بصراحة

المشكلة التانية

الفتيس بالبلدي بيعض في الغيار الثاني و كنت شوفت هنا موضوع ان ابطل العربية و انقل غيارات عشان اقرر هي زيت ولا دبرياج و بطلت العربية و عملت غيارات ناعمة و انسيابية مفيهاش مشاكل لكن لما بكون علي طريق و اجيب من التاني للتالت بيعض

المشكلة التالتة

العربية بتكركر مني علي مطبات و لازم ازود بنزين عشان متبطلش مني بس كركرة خنيقة شوية و امبارح العربية فاجأة لقيتها مش عايزة تسحب نهااااااااااااائي ماشية زي السلحفاه و النهاردة ماشاء الله عليها بتجري مفيهاش حاجة ناس تقولي بنزين وانا اصلاً حاطط بنزين 92 لأن مفيش بنزين 80 ولا 90 ف السوق مع العلم اني من القاهرة و اكيد المشكلة دي ناس كتير زيي بتواجهها وناس تقولي طقم كهرباء بوجيهات و ابلاتين و كوندنسر

أنتظر ردود الخبراء و العباقرة و أسف اني من اول توبيك ليا رغيت كتير جداً