[adham.com]

المشاركة الأصلية كتبت بواسطة ahmed_eng2001 انا كمان ماكنتش اعرف حاجة عن الكهربا على الاطلاق .... بس بدات العب كدة بالراحة فى الكهرباء واحدة واحدة و الدنيا بدأت تظهر معايا الظريف ان العربيات القديمة مفيهاش تعقيد و لا لوحات كونترول و لا حاجات معقدة انت مجوبتش على السؤال الى انت كنت بتدور عليه من فترة ...... ايه نوع البوية الى دهنت بيه البودى و تستحمل حرارة الموتور ؟؟!!!!

فعلا يا بشمهندس العربيات القديمة فيها ميزة إنها اسهل في موضوع الضفيرة و مش معقدة و لا فيها كنترولات و لا حاجات زي دي

----------------------

موضوع الألوان معلش نسيت أجاوبك عليها ... غصب عني

بص يا باشا
في بداية الأمر انا إستخدمت ألوان ذهبي و فضي علبتين ربع كيلو كل علبة ب 15 جنيه
دهان عادي بفورشة
جبتهم من عند الموان و سألته هل تستحمل حرارة عالية مع المعادن ... للأسف قاللي أه
و كانت المفاجأة إني بعد ما دهنت الفتيس بالكامل باللون الفضي و دهنت البلوك باللون الذهبي وكانوا بينشفوا بسرعة خلال دقائق قليلة ... و لكن الصدمة لقيت إن اللون بيروح بسرعة مع التنظيف بقطعة قماشة مبلولة بشوية بنزين خفيف

قولت لاء مش هينفع الكلام دة

روحت لموان تاني غيره قولتله عايز بوية للمعادن و تستحمل حرارة ... قاللي اللاكية يستحمل أي حاجة و مش بيروح مع البنزين و لا الجاز ولا مع غسيل

إشتريت مجموعة ألوان علب ربع كيلو لاكيه (أبيض و اصفر و أحمر و إسود )
و بدأت هنا بخلط الأوان عشان أخد بعض الدرجات زي (رمادي و نبيتي و أصفر حمصي)
و هنا بقي لما دهنت أجزاء الموتور بالاكيه بفورشة لقيت إنه بينشف بعد يوم في الشمس
لكن النتيجة لقيته مهما مسحت بالبنزين أو الجاز .. مستحيل الألوان تروح نهائي
و مع التجربة طبعا مع الحرارة لقيت الألوان ثابته
و كمان غسلت الموتور مرتين في المغسلة بالمسدس المياة القوية .. برده الألوان ثابتة و مفيش أي تقشير و لا أي حاجة بتروح

و خد بالك يا بشمهندس أنا إديت كذا وش
تقريبا ثلاث وشوش لكل قطعة دهنتها باللاكية

و إضطريت طبعا أسيب بعض الأجزاء الصغيرة إللي دهنتها بالذهبي و الفضي زي طلمبة المياة و طلمبة البنزين و بعض الرفايع
قولت اسيبهم علي نفس ألوانهم عشان يبقي شكلها حلو في الفيديو

و لكن مع الغسيل و الحرارة (الفضي و الذهبي) بدأ يروح و يتشال من مكانه