[silverlite]

خالد تليمة
طيب هقول شوية كلام عارف انهم مش هيعجبوا حد.. وده هيكون تحليل من وجهة نظرى مش معلومات .
اولا: فى جناح فى السلطة مازال رافض اى تغيير واعتقد انه بيدفع فى اتجاه اسقاط الدستور قبل طرحه للاستفتاء والعودة لدستور ٧١ .
ثانيا: طبعا هما مش واخدين بالهم ان فى حالة فشل الدستور ده المشهد هيطربق على الجميع.
ثالثا: طبعا فى محاولة من الاخوان وحلفائهم لاستغلال اللحظة والسلطة بغبائها بتدفع ببعض الشباب المتحمس او المغرض لخندق الاخوان.. انما مهم نأكد ان اى تحالف مع الاخوان هو خطيئة كبرى ومالوش اى تبرير ....
رابعا: فى محاولة لدفعنا للاستقالة والانسحاب فى التوقيت ده، وفى اعتقادى ان ده هيبقى خطأ كبير ومعناه اننا كقوى ثورة بنرجع لنقطة الصفر.
أخيرا: لازم تبقى مصدقين انى مش مبسوط وانا فى مكانى ولو القرار ده يخصنى لوحدى كان زمانى استقلت من بدرى انما القرار اظنه يخص جيلنا كله وكمان هيأثر بشكل كبير فى طريقة وشكل وجودنا فى السلطة فى الفترة اللى جايه..
اخيرا مره تانيه: انا مع قانون ينظم حق التظاهر بس اكيد كمان مش القانون ومش بطريقة التطبيق دى، ومش بالعقلية دى.
ملحوظة: ممكن متبقاش موافق على كلامى ده. بس الاكيد ان اللحظة دى حرجه ومحتاجين كلنا نفكر بهدوء عشان البلد مش حمل اى مواقف متطرفه ومتعصبة ومستعجلة من اى حد..