[SUPER MARIO]

المشاركة الأصلية كتبت بواسطة ahmed_eng2001 الله ينور عليك .... فعلا ... المادة 172 افضل من المادة 196 فى موضوع الاستئناف فى قرارات المحاكم العسكرية انا عند رايى فى المادة 174 .... المواطن المدنى يحاكم امام محاكم مدنية بغض النظر عن طبيعة التهمة الموجهة اليه .... المادة 174 فعلا ممكن تفتح المجال ان اى حد مدنى يتحاكم امام المحاكم العسكرية بمعنى .... " أو الجرائم التي تمثل اعتداء مباشراً على ضباطها أو أفرادها بسبب تأدية أعمال وظائفهم " يعنى لو اتخانقت مع جارنا الظابط علشان مكان ركنة العربيات ... هل ده ممكن يتاخد انه بسبب تادية عمله و وظيفته ؟!!!!

استاذ احمد اسمحلى اختلف معاك شوية بخصوص المادة 174
"اختلاف الرأى لا يفسد للود قضية"
حضرتك مواد القوات المسلحة تختلف اختلاف جزرى عن تلك المواد التى ذكرت فى دستور 2012
تنص المواد فى الدستور الجديد انه لن يحاكم مدنى واحد امام القضاء العسكرى الا فى الجرائم التى تمثل اعتداء مباشر على القوات المسلحة او ضباطها ...... الى اخر نص المادة
بشرح بسيط حضرتك ماشى بعربيتك و حصل حادث تصادم بينك و بين سيارة اخرى لا قدر الله و كان يقودها ضابط قوات مسلحة و نشبت بينك و بينه مشاجرة ستحرر لكما محضر بالواقعة و تذهبون انتم الاتنين الى قسم الشرطة العادى و يحرر محضر و يبت فى القضية امام القضاء و النيابات المدنية العادية و لا دخل للقضاء العسكرى بذلك
حضرتك جيت تركن تحت منزلك و لقيت فى المكان اللى بتركن فيه سيارة اخرى راكنة انتظرت حضرتك صاحب هذا السيارة و طلع ضابط قوات مسلحة و نشبت بينك و بينه مشاجرة هتروح قسم الشرطة العادى و تحرر لا محضر و تمثلوا انتم الاثنين امام القضاء المدنى العادى و النيابات المدنية و لا دخل للقضاء العسكرى بذلك اطلاقا
حضرتك غسلت ملابسك و قمت بنشرها و ملابس حضرتك ديه نقطتت بعض نقط المياه على الجار اللى تحتك و طلع هذا الجار ضابط قوات مسلحة و نشبت بينكم مشاجرة ستحتكمون الى النيابات و المحاكم المدنية و لا دخل للقضاء العسكرى بذلك اطلاقا
حضرتك فاكر خطاب ال 3 ساعات بتاع الرئيس محمد مرسى لم قال فيه على العيال اللى بتشتمه انه هو القائد الاعلى للقوات المسلحة و هيحاكمهم محاكمات عسكرية (سوء استغلال للسلطات) حضرتك بالدستور الجديد لن تسمع رئيس يقول مثل هذه العبارات مرة اخرى بالدستور
الدستور الجديد لا يسمح لرئيس الجمهورية ان يحيل اى قضية للقضاء العسكرى .
حضرتك بقى حضرت 4 زجاجات مولوتوف و جيت بجوار مدرعة جيش و اقيتهم عليها و بداخلها عند القبض عليك ستحاكم فى هذه الحالة امام قضاء عسكرى حضرتك اقتحمت ثكنة عسكرية او منطقة عسكرية و اعتديت على الضباط او المعدات او قتلتهم ستحاكم امام القضاء العسكرى .
من وجهة نظرى المتواضعة هذا افضل قانون للمحاكمات العسكرية على مر تاريخ مصر و قارنها بدستور الاخوان فهى الافضل مش هيخاف من القانون ده غير واحد ناوى يفجر مدرعة و يقتحم ثكنة فى سيناء و يقتل جنود ابرياء لو قارنت ما جاء فى هذا الدستور بما جاء فى دستور الاخوان فهو افضل من هنا لحد بكرة و كفاية مش هتسمع رئيس بيقولك انا هحاكم اى حد يعارضنى محاكمة عسكرية
اسف على طول شرحى بس اتمنى انى اكون قدرت اوضح لحضرتك تفسير المادة 174
طبعا لا قدر الله كل الحاجات اللى انا قولتها فى الامثلة اللى كنت بشرح فيها تحياتى لك استاذ احمد