[tata33]

اكيد مفيش واحد مبيحبش اسكندرية ولما بيروحها بيبقى مش عاوز يرجع بلده بل احيانا يحاول ينقل حياته ومعيشته ليها. وطبعا بيروحها بالسيارة او القطار وبما اننا فى المنتدى الجميل ده يبقى بنكلم عن الرحلة بالسيارة . وانا هنا بكلم عن الطريق الزراعى خاصة المسافة بين طنطا واسكندرية والحقيقة كنت أمل انى اجد على المنتدى حد اتكلم فى هذا الموضوع لكن لم اجد . انا فاكر زمان من 10 سنين اخدت المسافة من اسكندرية لطنطا فى ساعة بكرر ساعة .فماذا حدث اليوم العجب العجاب فالوضع بصراحة مزرى جدا .
فانت تجد الطريق اصبح اما سوق او سيرك . سوق لكثرة البائعين اللذين تقابلهم على الطريق وهم يتفاوتون حسب المكان الذى تمر عليه فهناك باعة الذرة المشوى منتشرون بكثرة ثم باعة الليف ثم باعة الشاى وباعة اللحمة فى التوفيقية وحاليا الحواوشى ثم الاكشاك . طيب يوقفوك ازاى ؟؟؟؟
هنا مربط الفرس كمية مطبات غريبة مستعد ادفع اى فلوس واعرف سبب عمل هذه المطبات حاولت كتير اعرف لدرجة انى وقفت عند احد المطبات ونظرت حولى هل هو مدخل بلد او يوجد طريق متفرع او مزلقان مثلا او اى شئ ؟ ابدا البتة
المصيبة ان هذه المطبات ادت مصائب اخرى فبسبب هذه المطبات بتحدث اختناقات بسبب التريلات النقل والتى تضطر للمشى ببطء عند هذه المطبات وبالتالى نظرا لحمولاتها الثقيلة تقوم التريللات بتكويم الاسفلت حتى انك لاتستطيع الانتقال من حارة لاخرى بسبب هذه الاكوام الاسفلتية بين الحارات .
اما السيرك اللى على الطريق فهو من كمية المركبات اللى ماشية عكس الاتجاه . بعد كل هذا تجد ان المسافة من طنطا لاسكندرية اخدت منك 3 ساعات يعنى لو رايح وراجع فى نفس اليوم يبقى 6 ساعات طبعا حرام طبعا ناهيك عن كمية الوقود المهدرة واللى الدولة بتدعمه والوقت المهدر. خلى بالكو اشهر الاختناقات على الطريق تحدث عند مدخل طنطا تحت الكوبرى (عمرك شفت كوبرى يتعمل على الطريق بالعرض يعنى بدل مايبقى للسيارات المتجهة لاسكندرية بقى للسيارات داخل طنطا ) ثم مدخل دمنهور واه من دمنهور ربنا معاكو والسلام عليك