سلام عليكم
طبعا كلنا عارفين الاير ماس و ده بأختصار الحساس المسؤول عن تحديد مقدار تدفق الهواء اللى داخل على ثروتل الموتور
طبعا كلنا عارفين ان فيه نسبة بنزين للهواء بيشتغل عليها الموتور و انه بيزود البنزين مع زيادة معدل تدفق الهواء عشان يحافظ على النسبة دية و اللى بتنعكس بالضروروة اننا بنحرق بنزين اكتر و بناخد قدرة اعلى للمحرك و احصنه اكتر
و ده بيكون فعال فى حالة التربو و السوبر شارجر او اى شحن جبرى كان
طيب ايه الفرق بين الاير ماس العادى والاير ماس الرياضى
ببساطة الاير ماس العادى و بيكون استوك فى العربية معادا عربيات الفورد و الفرارى و الدودج هيا اللى نازله بأير ماس رياضى على طول
الاير ماس العادى بيكون مبنى على تطبيق المقاومة الحرارة و المكثفات التى تتغير سعتها بزيادة الريفابلتى اللى هيا بتزيد بزيادة معدل الهواء
الاير ماس الرياضى بيكون مبنى على ترانزيستور و دايرة الكترونية بتحس بسرعة جدا بأقل تغير طفيف فى الحرارة و ده معناه دقة و سرعة كبيرة بعكس المقاومة و على ما تحس بقى ابقى تعال قابلنى
طيب و بعدين
يلا نعمله خلص الكلام .
هنحتاج الاتى :-
1-ماسورة بى فى سى بقطر الثروتل بتاع عربيتك
2- شوية المكونات اللى هذكرها فى الدايرة دية اللى هيا فى الملف المرفق
3- شمع لحام و ايبوكسى
4-علبة بلاستك صغيرة و مصاصة بلاستك
5-كام سلك محمل بألوان مختلفة
المهمة :- عمل اير ماس رياضى
التفاصيل
1- تجهيز الماسورة
2-تجهيز الحساسات
3-عمل دائرة الاير ماس
4-عمل دائرة حساس الحرارة
5-التجميع
6-التفنيش و الازق و التغليف
1- تجهيز الماسورة
هنخرم كذا خرم بقطر 5 مم فى الماسورة من وسطها و هنكون قصينا الماسورة بطول 12 سم
زى كده
2- تجهيز حساس الهواء
هنوصل اطراف اسلاك نحاسية ناشفه للحساس لاحظ انه عباره عن ترانزستورين زى ما هو موضح فى الدايرة
و بعد كده هنحط الحساسين جوه المصاصات البلاستك عشان بس يبقو قاسيين و نوصلهم ببعض حسب الدايرة ما بتقول
و دلوقت نركبهم فى الماسورة بالشكل ده و لاحظ ان وش الحساس لازم يكون مقابل لتيار الهواء
و بعدين نركب الحساس الثالث الخاص بالحرارة و ده ليه دايرة لوحده لكننا هنحطه على نفس الكارت الالكترونى عشان منعملش زحمة
نعمل تثبيت بالايبوكسى للمصاصات و نركن دية دية شوية على ما نجيلها
3- عمل دايرة الاير ماس
و هنا بقى هنقوم بتجميع التصميم المرفق على اى كارت تيست بورد يناسبك
و فى ملاحظة قيم المقاومات الكسرية و الصغيرة دية اجبارية و عشان كده هتعمل توافيق بين المقاومات ممكن تعمل قيمة واحده بأربع مقاومات و ممكن ب 3 و ممكن ب 2 بس اطمئن ان دية مش موجودة غير فى 4 حالات بس على الكارت كله
و اظبط المقاومة المتغيرة على النص لحد اما تشغل الدايرة و تقيس بالافو خلى اقصى خرج ليك 2.5 فولت بتغيير قيمة المقاومة لو عليت عن كده هتحتاج تعلى الكهرباء عشان متهدرش البنزين وده مش مطلوب يعنى
و طبعا بنستخدم قصدير مناسب
4-عمل دايرة حساس الحرارة
و دية بسيطة تنين هتلاقينى مصور الداتا شيت و معلم على تصميمها و ده ابسط حاجه و الكمبيوتر هيفهم التفاصيل التانية لأنه المفروض هيكبر الاشارة على مزاجه
5- التجميع
فى التجميع هنتحرك كأننا بنحسس الاول هنركب العلبة الصغيرة بالشمع فوق الماسورة و نعمل فى قعر العلبة خرم
هنوصل الكارت بأماكن الحساسات و لاحظ ان الكارت هيتحط مقلوب عشان نحمى اجزاء الدارية كويس مع وجود امكانية اننا نقلبه الناحية التانية وقت ما نحتاج نعاير المقاومة
و ياريت لو ندهن نحاس الكارت من تحت بأى دهان او ورنيش بعد ما نختبره عشان الصداء
و الكابلات اللى خارجه من الحساس يا ريت نعرى اطرافها و نسقيها قصدير عشان تبعى عامله زى البن اللى فى السوكت بتاع العربية و ممكن تشتريله فيشه على مقاسه براحتك
و بعدين نقفل العلبة و نعمل فتحة فيها تخرج الكابلات بتاعة الاير ماس
نعمل اختبار تشغيل للحساس كله على 5 فولت
نجيب مكنسة تشفط او بلاور ينفخ على الحساس و نقيس الخرج بتاعه على الافوميتر و نتأكد انه بيزيد مع زيادة الهواء اللى بيتحرك عليه و بعدين نعيره فى حالة الهواء العادى نخلى القراءة صفر
خلاص اتأكدنا من حساس الهواء نتأكد من حساس الحرارة بالاستشوار بتاع الشعر و نشوف بيقراء زيادة فى الفولت ولا لا
و نبداء بقى نثبت العلبة بالايبوكسى و نسد كل الاخرام الزيادة لو مركبين تربو هنطلع ماسورة من الاخرام دية تغذى الساعة اللى بتقيس ضغط التربو ادق ضغط هناخده من النقطة دية تحديدا
وبعد كده نفصل شبكة سلك عشان التراب و نحطها على مدخل الهواء على الحساس و نلحمها هيا كمان بالشكل ده
بعد كده نغلف الماسورة كلها بشكارتون او كاربون فايبر او اى تغليف يعجبك
كده مثلا
مبروك عليك الاير ماس الجديد
الالوان بتاعة الاطراف
الاحمر موجب
الاسود ارضى
البنى خرج الحساس الاير ماس
الاصفر خرج حساس الحرارة الموجب
البرتقالى خرج حساس الحرارة السالب
التكلفة الاجمالية 20 جنيه مصرى فقط لا غير
الحساس ليه 3 وضعيات الوضعية الطبيعية بيكون صفر فى حالة عدم وجود هواء الوضعية بتاعة السفر اللى اكتر من 300 كيلو بيكون 1.2 فى حالة عدم وجود هواء
الوضعية بتاعة السرعة والاستعراض بيكون 1.5 فى حالة عدم وجود هواء
بتتحكم فى ده بالمقاومة المتغيرة و بتقيس الفولت الخارج من الاوت بوت
ملاحظات متحولش تعمل ناصح و توصل الموجب و الارضى فى البطارية هما بياخدو من كبل الحساس نفسه 5 فولت مش 12 فولت
بالتوفيق و اللى هيحاول هساعده و فى جزء تانى للموضوع للى عنده عربية كربيراتير من غير حساسات خالص و عاوز يتحكم فى البنزين و هنا بقى هنعمله طرمبة اضافية و دايرة تحكم تظبطله المسئلة بناء على تجاوب الاعضاء هحدد اذا كنت هنزل الجزء الثانى و لا
دمتم سالمين