[أحمد الشلبي]

السلام عليكم ورحمة الله وبركاته ياأهل المنتدى الكرام
النهاردة انا لسه راجع من توكيل بى واى دى فرع القطامية عملت الحمد لله صيانه ال 1000 كم وهحكيلكم اللى حصل :
يوم الأحد اللى فات إتصلت بالتوكيل علشان احجز أول صيانه للعربية فرد عليا واحد وقالى تعالى على طول قولتله يعنى مفيش رقم حجز قالى لا تعالى في اى يوم عادى قولتله ماشي
. النهاردة وصلت قدام توكيل القطامية الساعه 8.10 صباحا علما بإنى جاى من المنوفية , قابلنى واحد على البوابة اخد الرخصة واخد بيانات العربية وقالى انت قدامك عربيتين ودخلت من البوابة ركنت ورا العربيتين وكانت بداية اليوم جميلة اتبسطت جدا من اول مقابلة , وبعدين الساعه جت 9 لقيت المهندس جه ومعاه امر الشغل وقالى في اى مشاكل في العربية قولتله على حكاية الصوت اللى بيجي من ورا في العربية وان الفتيس خشن ولمبة حزام الامان , وبعدين جه واحد اخد العربية دخلها الورشة الكلام ده كان الساعه 9.15 تقريبا , وبعدين طلعت الاستراحه علشان اشوف العربية من فوق وهى بتتعمل , الساعه جت 11 والعربية زى ماهى جوه الورشة محدش بص عليها , مع العلم ان كل العربيات اللى دخلت بعدى كانت بتمشي , قولت ما علينا نستنى ونصبر الساعه جت 12 , وانا خلاص زهقت بقي , المهم نزلت تحت اشوف ايه الحكاية قالولى اتصل بالمهندس على رقم 119 على الداخلى , اتصلت بقوله على العربية لقيته بيقولى ان مفيش امر شغل للعربية قولتله يعنى ايه قالى يعنى دور على اللى عاملك امر الشغل , روحت خرجت بره وقعدت ادور على اللى بيعملوا اوامر الشغل لحد مالقيت اللى كان عاملى وقولتله راح داخل معايا جوه علشان يشوف ايه الحكاية المهم لقيته خارج بيقولى امر الشغل جوه موجود , والعربية عشر دقايق وهتتعمل , قولتله ماشي , المهم طلعت فوق الاستراحه الساعه جت 1.10 ومحدش قالها سلامو عليكم , انا بقي خلاص اتنرفزت جدا وروحت داخل على مدير التوكيل قولتله حصل كذا وكذا , راح قالى هو انت حاجز ؟ قولتله انا اتصلت يوم الاحد وقالولى تعالى على طول ولو مش مصدقنى انا مسجل المكالمة على تليفونى اهو اسمعهالك ؟ , راح قالى انا على فكرة كنت تحت ولسه شايف العربية داخله دلوقتى الورشة , انا طبعا الكلمة دى استفذتنى كنت هخرج لفظ مش حلو خالص , المهم انا طلعت فيه بقي وقعدت ازعق وقولتله يعنى انا كذاب وانتوا بتستهبلوا والناس عمالة تمشي اللى جاى الاخر ومفيش نظام , المهم راح متصل بالمهندس تحت وقاله يعمل العربية , والعربية خلصت وطلعت واستلمتها الساعه 2.10 الظهر وقابلنى الراجل اللى دخل العربية واستغرب وقالى هو انت لسه ممشتش ؟ طبعا ضحت ومشيت
بصراحه انا بقالى 3 سنين بتعامل مع توكيل رينو عمرهم ماعملوا فيها كده ,
انا لاحظت بقي في توكيل بي واى دى ان الخدمة زبالة مش سيئة وبس لان ناس كتير حصل معاهم زى ماحصل معايا النهاردة ومش هقول اكتر من كده