[هشام الحسيني]

انا بحلم باليوم اللي نلاقي فيه عربية صناعة مصرية 100% بدأ من التصميم لحد الموتور حتى اسم العربية يبقى اسم عربي... انا كان معايا 128 ودلوقتي معانا اكسيل و نيسان صني... و للمصادفة التلات عربيات دول تقفيل مصري... طبعا دي مصادفة بس اتمنى الاقي في يوم عربية صناعة وطنية
انا نفسي نعدي مرحلة التجميع اللي وقفنا عندها من الستينات ايام الرمسيس و الـ1100 مرورا بال128 والشاهين واللادا
اعتقد الخطوة المفيده دلوقتي عشان احنا فاتنا القطر اننا نشتري تكنولوجيا... اعتقد ده هايقصر المشوار كتير... زي ما الحكومة الماليزية ساهمت في شركة برتون وكانت النتيجة ان بروتون الماليزية اشترت لوتاس البريطانية... واعتقد النتيجة كانت مبهرة... ان العربيات البروتون كله بيشهد بكفاءتها...
برضو شركة تاتا الهندية اشترت جاجوار "على ما اعتقد" وبرضو نفس الفكرة... تاتا دلوقتي بتستعد انها تغزو العالم بالـ"تاتا نانو" ارخص سيارة في العالم
ليه احنا مانعملش كده؟؟؟ احنا مش ناقصنا اي حاجة عندما عقول و ناس بتفكر... وشعب بيحب العربيات
وعلى فكرة انا قريب عرفت ان المغرب بتصنع "سوبر كار" اسمها "براق" اعتقد انها بالتعاون مع شركة عالمية بس انا ماعنديش معلومات كتير عنها بس كفاية انها تصميم مغربي واسمها "براق"
اتمنى من كل القائمين على الصناعة في مصر انهم يحطوا الموضوع في دماغهم شوية عشان احنا نستاهل نبقى احسن من كده