[AbOnOrA]

طيب اولاً وقبل اى موقف انا مقدر تماماً للدوافع النبيلة وراء طرح الموضوع واشكركم عليها جميعاً وده المعتاد فى اسرتنا مصرموتورز

لكن فيه نقاط مهمة فى الموضوع ده وهى

اولاً اى مواضيع خاصة بالايقافات والمشاكل وماشابة مكانة فى ساحة الشكاوى والساحات الادارية مش فى الاستراحة واذا كان الموضوع اجتماعى فاعتقد كتير من الزملاء شهدو وتابعو كل الاحداث والايقافات المتعددة والمشاكل المتعددة اللى حصلت من العضو وبعضهم تفضل مشكوراً بسرد غالبية الحقائق فعلاً
لكن طلب رد منى بصفتى فى الإدارة يبقى الكلام يتنقل الساحات الإدارية لو حبيتو

ثانياً وبشكل اجتماعى وشخصى بحت انا مبحبش اتكلم عن حد فى غيابة واذا العضو نفسه كان باقى على المنتدى كان فكر فيه او دخل واجه او اتكلم فى اى حق ليه لكن ده مش حاصل العضو ترك المنتدى بارادتة وبافعالة

ثالثاً لازم نتفق على ان الإدارة بتتعامل مع جميع الاعضاء بمستوى واحد من التقدير والاحترام سواء كان ليهم مشاركة واحدة او مليون مشاركة مينفعش اعمل وضع خاص لعضو تجاوز كل القوانين لكونة مشارك بفعالية اكتر من عضو تانى
وما اسهل ان العكس يكون هو الصحيح وندلع الناس طالما عاملين جو وحركة ويتملى المنتدى مواضيع من نوعية شبشبى ضاع ياعينى ده كان بصباع ونملى مواضيع ومشاركات فى سلامات يا برنجى ونبقى اكبر منتدى فى مصر وعدد المشاركات فى اللمون بس مش هيبقى ده مصرموتورز
مصرموتورز مجتمع مصرى بيربط بين اكتر من 150 الف عضو ومتابع دائم بالاضافة الى اكثر من 2 مليون زائر ومئات الشركات والتوكيلات ومراكز الخدمة والمتخصصين كلهم بيكملو بعض ومحدش اكبر من حد ولا حد اكبر من قواعد ونظام المكان وصدقونى اللى بيحب المكان مش هيلاقى صعوبة فى الكلام ده
وعلى العكس اللى بيكره المكان ومغرور بشعبيتة وعايز يعمل مكان منافس هو اللى بيبقى عندة مشكلة وبينتهى السيناريو المكرر الى حد البواخة بمجموعة اعضاء يكونو شله ويعملو موقع جديد فى اقل من سنة بيفشل ويختفو احنا بنتكلم عن عمر 6 سنين وممكن بعد 6 سنين كمان اذا ربنا احيانا افكركم بالكلام ده تانى وتالت باسماء جديدة

ادينى برضو طولت عليكم انتو اللى جبتوه لنفسكو بقى