[adham.com]

المشاركة الأصلية كتبت بواسطة كنتوش السلام عليكم ورحمة الله وبركاته العربيه عندى لما اجيب مرشدير تترجرج جامد جدا وعصاية الفتيس ترجع مكانها تانى وخصوصا لو فيه طوبه ورا العجله او الارض مش مستويه واتنين ميكانيكيه قالولى بسبب ان الشاسيه مفتوح وواحد قاللى مقفول طيب هى لو بسبب الشاسيه مش تبقى قدام وورا وكمان بسمع صوت طقطقه وانا ماشى قدام وفى الملفات كان الشاسيه هو اللى بيطقطق وده بعد ما حط الميكانيكى ورده للكوبلن على الورده اللى كانت موجوده وربط صامولة العجلة على وش الكوبلن وقاللى الحل انى ارفع المكنه واروح لسمكرى وقاللى على حل تانى وهو انه يجيب اكس للكوبلن اطول يعوض فرق المسافه او انه يقطع الاكس ويزوده ويلحمه صلب يا ترى هى دى المشكله فعلا ولا ده اسطوتانه ودسك وهل الحلول دى سليمه وخصوصا الحل الاخير وشكرا

و عليكم السلام و رحمة الله و بركاته
أخي الفاضل
هناخد الموضوع واحدة واحدة

1- تروح لبتاع زوايا محترم و يكون بيفهم و باله طويل عشان تقدر تتكلم معاه
و تقوله يا تري المقاسات بتاعت الحوض أخبارها ايه
هل محتاجة ضبط سواء تفتح او تقفل الحوض مثلا و لا ايه

2- الحوض لو مفتوح زيادة عن اللزوم يبقي الأكس بالصليبة الداخلية للفتيس مش هيبقي راكب مرتاح جوة في مكانه .. و بالتالي ممكن يحصل رجرجة بمجرد ما تدي أي غيار و هتلاقي العربية ما بتمشيش أصلا و ثابتة في مكانها من قوة الرجرجة

و الحل هنا هو الذهاب لسمكري أو متخصص ضبط شاسيهات عالبارد و يعمل زرجينة يقفل بيها الحوض بدون رفع الموتور نهائيا
و إللي يقولك لازم الموتور يترفع يبقي مش بيفهم لأن الموضوع مش مستاهل رفع موتور خالص

3 - امتي نقول ديسك و اسطوانة و بلية
لو فر رجرجة بسيطة أو بيسموها (رعشة) في الطلعة فقط علي الأولاني أو ممكن تبقي علي الغيار الثاني أحيانا بعد ما تدي الغيار و تشيل رجلك من عالدبرياج بتحس برعشة
هنا نقول الديسك مش تمام
أما لو العربية سحبها ضعيف و مش بتجري .. دة له كذا سبب يخص الكهرباء و الاسبراتير و أخيرا الأسطوانة
أو لو بتشم ريحة شياط تيل أو بتحس بسخونية و نقص دائم في منسوب المياة مع ضعف السحب
نقدر نقول إنها الأسطوانة

4- موضوع الطقطقة في بداية السير و لحظة التوقف له ثلاث اسباب :-

السبب الأول
قاعدة الفتيس اللي تحت الموتور مربوطة في القنطرة ممكن تكون مقطوعة أو طرية زيادة عن اللزوم أو إنتهي عمرها الأفتراضي و تحتاج لتغيير
أو ممكن تكون سليمة لكن مش راكبة كويس بطريقة مريحة أو محتاجة رجلاش من ناحية عدم تثبيتها كويس

السبب الثاني
قد يكون عندك شروخ في الركبتين إللي ماسكين الميزان .. و هنا السمكري يقدر يشوفها بسهولة و يمسكها بزرجينة و يديها لحام كويس أو لو محتاجة تتغير يبقي ماشي مش مشكلة و ساعتها هتتغير بدون رفع الموتور برده

السبب الثالث
الكوبلن ممكن يبقي مبوش من جوة عشان كدة بيعمل معاك طقطقة و ساعتها هتحس بالطقطة أثناء الملفات بوضوع مسموع .. و هنا هتحتاج تغيير الكبالن

طبعا انت إللي تقدر تحدد العيب منين أكثر بما انك أدري بنفسك
و أدري إيه اللي سليم و ايه اللي بايظ


لاحظ ملحوظة هامة أنك كل ما بتسكت و تطنش لأي مشاكل عندك
بتزيد المشاكل و ساعتها ما بتقدرش تحدد العيب منين

لازم اي مشكلة تحصل تصلحها علي طول اول بأول عشان كل ما تهتم بعربيتك .. تهتم بيك و تديك الأداء اللي انت عايزه

نصيحة ليك و النبي الله يكرمك تحطها حلقة في ودنك بالله عليك يا أخي
إبتعد تماما عن كل صنايعي يفتي فتاوي و يخترع إختراعات مالهاش لازمة ممكن توديك في مصيبة لقدر الله

مفيش حاجة إسمها نجيب أكس طويل و الكلام الفاضي دة

و مفيش حاجة أسمها نقطع الأكس أو نزوده لحام صلب

ماتخليش الواحد يخرج عن شعوره