الحمد لله و الشكر لله
نزلت على الميكانيكى البيه ملقتهوش لقيت عيل صغير تقريبا الصبى بتاعه المهم قولتله عاوز اغير الكوبلن قالى لازم افك الدراع كله و الجو قعدت شرحتله الليلة كلها المهم جاب العدة و اشتغلنا فيه فكينا القديم و نزلت الكوبلن محل الاختبار
طبعا جبت شحم مطاط نوع ايسو جبت علبة كبيرة اخدت بنصيحة صديقنا هشام الجزار و جبت للولد الغوايش الربط الاصلية يا عم يرضيك يهديك مرضاش يربط بيها و قفش انى اجيبله افزنة عريضه المهم ريحتو و ريحت دماغى مش قادر اعافر فى الصيام
بعد ما قفلنا و دورنا سمعت ونه طبعا كنت هتجنن طلعت الصاجة اللى ورا اتلوحت عدلها و الونه اختفت
نزلنا العربية و جربنا على الطريق الاصوات راحت والكوبلن ظبط جربنا الطريق على الغيارت كلها و السلانسية و بعدين جربنا الملفات على الهادى و على السريع و الامركة
و احنا بنأمرك حسينا برعشه فى العجلة مش طبيعية رجعنا على الورشة تانى و فكينا لقينا المسمار اللى رابط الطنبوره فى المقص اللى تحت مقطوم قطم الحمد لله ربنا ستر غيرنا المسمار و طلعنا جربنا تانى كله تمام
ملاحظات قالها الولد الصغير
التيلة القديمة اللى راكبه على الاكس اللى بيركب فيه الكوبلن سيئة و لازم اغيرها
الكوبلن ناعم عن الطبيعى لكن قالى طالما شادد حيله خلاص " شغل معلمين بقى
"
دية بقى صور العلبة بتاعة الكوبلن الفاسد اللى كنت شاريه من التاجر اللى اسمه الكوثر و ده اللى باظ بسرعة بسبب فساد معدنه عشان محدش يتغش فيه
تفتكرو هيرضى الراجل يرجعلى فلوسى فات شهرين على شراء الكوبلن
تم بحمد الله