[aymangalal]

متوسط السعر فى السوق من 12 الف الى 20 الف على اقصى تقدير للحالة الممتازة
من خلال تجربتى مع العربية لو حضرتك غاوى نضافة وخصوصا نضافة الصالون (الفرش والابواب والتابلوه والسقف والفبر.. الخ) يبقى تركز على الحاجات دى لان قيمتها فى فى دواخلها ولو حاله الصالون من جوه كويسة يبقى اكيد تكون الحالة العامة برضه كويسة لان نضافة الصالون يدل على اهتمام صاحب العربية ليها واللى يخليها يحافظ عليها من جوه اكيد يحافظ عليه فى كل حاجه
جميع قطع الغيار الاساسية (ميكانيكا-عفشة-صاج-كهرباء) متوفرة فى الحرفيين والوكالة وجسر السويس
التكييف بالكتير يوم ما تحب تشغله هاتحتاج كومبريسور وسربنتينة ده لو مش موجودين فى العربية بحوالى 1000 جنية بالكتير استيراد وشحن وصيانة قول 500 يبقى كله 1500جنية
وطبعا فى حاجات بنبان بالعين المجردة كده زى حالة الصاج من بره مافيهوش بارومة او تجريح او خبطات تدوس على اركان العربية بالضغط عشان تعرف حالة المساعدين وتبص من تحت على الصاج عشان البارومة برضه وتحت الرادياتير وصاج الدواخل حوص وشنطة وصالون وقوايم ضرورى تكون فبريكه لان العربية دى مش منتشرة ومش مستهلكة وماينفعش تجيب حاجه رشة دواخل خالص لان كده يبقى فى اهمال من اللى راكبينها .. خليك فى المضمون
اتأكد كويس من حالة فرش الصالون وفبر القوايم الداخلى والعتب والرف الخلفى وكل زراير التابلوه والتابلوه مايكونش فيه تكسير او تجريح
ليه بقولك على كل التفاصيل الصغير دى لانها مهمة ماينفعش تحط فلوسك فى عربية من دول الا اذا كانت على الاقل حاله جيدة بنسبة 75% فى كل حاجه لان حاجاتها غالية شوية لكن بالمقابل معمره لابعد حد يعنى تغير الحاجة مره وانساها
العربية محتاجه عناية عشان ماتشتكيش منها خد بالك وبالتوفيق ان شاء الله