[مصطفى-حسن]

المعروف ان موبينة لانوس (وغالبية موبينات الالكترونى ) من الاشياء الغير قابلة للاصلاح فى السيارة
بمعنى ابسط لما الموبينة الالكترونى تقطع ... علطول بتجيب واحدة جديدة او استيراد

ودة اللى حصل معايا
من فترة الموبينة قطعت ( واحد وتلاتة ) وبعد التظيف والتكحيت ....الخ
مكنش فية مفر غير انى اشترى واحدة استيراد

لكن من كام يوم جت فى دماغى فكرة طايشة
انا لية مفكش الموبينة وابص عليها بصة
هيا كدة كدة بايظة
وكدة كدة هرميها فى السندرة مع كراكيب العربية
يعنى ملهاش لازمة

وعليها
جبت الموبينة وبصيت عليها ملقيتش فيها غير 4 اطراف بتوع الفيشة و 4 اطراف بتوع سلوك البوجيهات
وبس خلاص

حاولت اقيس بالافوميتر ظنا منى ان ال 4 اطراف بتوع الفيشة متصلين ب 4 اطراف بتوع سلوك البوجيهات .... ملقتش اى استجابة

ومفيش فيها اى حتة ممكن تفك منها غير الجزء المعدنى المتبرشم من جوة


جبت المفك العادة وبدأت رفع الجزء المعدنى المتبرشم بحرص
لانى اول مرة افكة ومش عارف اية اللى تحتة



ودة كان الشكل بعد رفع الجزء المعدنى



دايرة الكترونية مصغرة
ومتوصلة بالجزء اللى تحت المصمط عن طريق 6 نقط توصيل لحام
وموجود عليهم كلهم مادة عازلة وتقريبا حرارية
وعشان الوصف بتاعها يبقى مظبوط ....هيا شبة السيلكون الابيض اللى بيستخدموة بتوع الزجاج وشفافة وبتلزق فى الصوابع برخامة غريبة

بدأت انضف الجزء المعدنى (اللوحة الالكترونية) ونقاط التوصيل اللى تحت بالجفت من المادة دى







وبعدين عشان اتاكد من اتمام عملية التضيف بكفاءة
اخدت البوردة والجزء المصمط وغسلتهم ببنزين تنظيف وفرشة اسنان





ودة كان الشكل بعد عملية التنضيف



ومسكت الافوميتر وبدأت اقيس كل المسارات اللى قدامى على البوردة
لانى افترضت انى هلاقى قطع على البوردة الالكترونية مثلا
او هلاقى جزء اللحام بتاعة فاكك
او قصدير اللحام مشرخ
فكنت هعيد علية بالهوت اير والفلكس لحام

ولما لقيت كل النقط واصلة
فمكنش قدامى غير انى افترض ان القطع اللى حصل كان فى احدى نقاط التوصيل الستة من البوردة الالكترونية الى الجزء المصمط

وعشان اوصل ال 6 نقط دول بوصلات قصيرة (كبارى)
فكان لازم اقصر نقط التوصيل فى الناحيتين عشان ميحصلش تلامس وانا بقفل فى الاخر
لان المكان هيبقى مزنوق قوى وانا بقفل التقفيل النهائى
دى نقط التوصيل وهيا طويلة



وهنا بدات اقص منها الطول





ودة كان الشكل النهائى بعد القص



وبعدين بدات ازود نقط اللحام قصدير فى الناحيتين
فى البوردة الالكترونية
وفى الجزء المصمط







وبعدين جبت سلك 1 مم
وقصيت 6 قطع
طول كل قطعة 3 سم


وبعدين عزلت 2 مم من كل ناحية
وزودتهم قصدير وفلكس
عشان اضمن كفاءة وسرعة اللحام
عشان لما هاجى الحم هيبقى المكان مزنوق



وبعدين لحمت ال 6 اطراف فى الجزء الالكترونى
تمهيدا للحام الجزء التانى من السلك (الكوبرى)
فى الجزء المصمط



وبعدين جيت عند اصعب حتة
وهى لحام السلوك القصيرة فى الست نقط اللى فى الجزء المصمط
بحرص وبدون ما الكاوية تبوظ حاجة
وكان دة اصعب جزء فى العملية



وبعد ما خلصت لحام
جبت سيلكون حرارى
وحطيت كمية لا بأس بها فى وسط الاسلاك عشان من ناحية تكون عازل حرارى
ومن ناحية تانية تكون عازل كهربائى بين الاسلاك
عشان ميحصلش تلامس بين الاسلاك وبعضها
وبعدين رجعت قفلت الجزء المعدنى على الجزء المصمط
بحرص وبطء شديدددددددددددددددددد
وبعدين سبتها طول الليل عشان السيلكون ياخد وضعة وينشف
علما بانة سيلكون حرارى يعنى بيمسك مع الحرارة


وجيت تانى يوم
وخدت الموبينة ورحت العربية عشان التركيب
الاول فكيت الفيشة بتاعة الكهرباء



وبعدين نقلت اسلاك البوجيهات بنفس الترتيب
قبل ما افك الموبينة
وبعدين بدات افك الموبينة اللى راكبة فى العربية



وبعدين شبطت الموبينة الجديدة بالمسامير
بس ما ربطتش جامد عشان اجرب الاول
يمكن الفكرة تفشل



وبعدين جيت للحظة الحقيقة
اختبار كل ما فعلتة
يا ترى هتدور وتعد 4
ولا هتفضل زى ما هيا قاطعة واحد وتلاتة
وسميت اللة
وحطيت المفتاح فى الكونتاك
ودورت
وهوب

































دارت العربية على الموبينة اللى انا صلحتها

استنيت شوية لحسن يمكن تقطع تانى
او واحد من الاربع اطراف يقطعوا

مفيش قطع...........
تمام.

ركبت العربية وقلت اختبرها فى المشى والسحب.........
لقيتها عادية.

قلت اجرب اجرى على سرعات فوق المتوسط 120 140 كم/س..........
الدنيا شغالة.

رجعت تانى
وبطلت العربية
واستنيت لما هديت العربية وبردت
وحرقت على المسامير بتاعة الموبينة



فية تنبية بسيط
الموضوع دة كلة كان مجازفة من الاول للاخر
وكان اول مرة اعمل الموضوع دة
وللامانة العلمية والايضاح
انا لما فكيت مكنش عندى تصور واضح للى هلاقية فى الموبينة
وللامانة برضو انا لما راجعت على الدواير الالكترونية الموجودة فى البوردة كنت براجع من باب التتبع البصرى والافوميتر
مكانش فية مخطط ولا مانيوال اشتغل علية

انا لا ادعى العبقرية
ولكنى اجتهدت
ولكل مجتهد نصيب


ليا طلب بسيط من ادارة المنتدى
وطلب بسيط من العضاء

الطلب اللى من ادارة المنتدى انها لو شافت الموضوع انة يستحق التثبيت ارجوا الا يقوموا بتثبيتة الا بعد مرور شهر على الاقل (لان المواضيع المثبتة محدش بيدخل عليها غير الاعضاء الجدد)

والطلب البسيط من الاعضاء ان لو اى واحد استفاد من الموضع انة يقرأ الفاتحة بينة وبين نفسة (فى سرة) لوالدتى يرحمها اللة لتكون فى ميزان حسناتها

واى استفسار انا حاضر