سلام عليكم
ده الموضوع الرابع اللى مش هلاقى تفاعل ايجابيى فيه برضو كسابق المواضيع
و انا بتكلم اول امبارح مع صديق على الشات عن الضلمة و العربية و المطبات و خصوصا الشوارع اللى بتبقى مضلمة طقت فى دماغى اعمل حاجتين الحاجه الاولى انى اشوف فى الضلمة و انا سايق و الحاجه التانية انى اقدر اشوف على مسافات بعيدة 2 كيلو فأكثر
تحقيق الكونسبت الاول لازم عشان يتم يكون في كاميرا رؤية بالاشعة التحت الحمراء
تحقيق الكونسبت التانى لازم يكون فى تليسكوب عشان يشوف لبعيد
طيب ايه الفرق بين كاميرا الرؤية الاشعة التحت الحمراء و كاميرا الرؤية الحرارية
الفرق كبير جدا كاميرا الرؤية بالاشعة تحت الحمراء بتصور اى جسم "بينعكس" عليه ضوء بالاشعة التحت الحمراء او اى ضوء ضعيف
كاميرا الرؤية الحرارية بتصور اى جسم "يشع " حرارة حتى لو حرارته بالسالب طالما مختلفة عن درجة حرارة الوسط بيبان الجسم ده و طبعا الكاميرات دية معقدة جدا و ليها نظام تبريد بالنيتروجين و قصص كده مش هوجع دماغكم بيها
طيب كاميرا الرؤية بالاشعة تحت الحمراء ايه الفرق بينها و بين كامير الرؤية العادية
الفرق فلتر اه و الله الفرق فلتر بس !! يعنى الكاميرا العادية بتكون مزودة بفلتر زجاجى احمر يمنع مرور الاشعة التحت الحمراء و يمتصها عشان متأثرش على الصورة و يعدى كل الألوان التانية
كاميرا الاشعة التحت الحمراء الفلتر بتاعها بيكون لونه بنفسجى قاتم و ده بيمنع مرور كل الألوان ما عدا اللون الاحمر
طيب الكلام ده فى كل الكاميرات اه فى كل الكاميرات من اول كاميرات الويب لحد كاميرات الديجيتال و الموبايل
طيب الكونسبت التانى عشان نمشى فيه محتاجين ايه محتاجين كاميرا فيها عدستين بعدهم البؤرى صغير نضيف عليهم عدسة كمان بعدها البؤرى كبير شويه و تكون من مادة مختلفة غير مادة العدسيتن بتوع الكاميرا فلما يركب التلاته مع بعض يحققو مبداء التلسكوب الكاسر للضوء و اختلاف نوع العدسات يلغى ظاهرة اسمها الزيغ اللونى و دية عشان منشوفش الصورة فيها طبقات و تشوهات ملهاش لزمة
و اهم من ده كله عاوزين نكون حريصين ان القطعة دية يكون حجمها صغير
طيب تعالو للتصميم العام بعد كل المعطيات دية هيكون عامل ازاى شوف الصورة ده من تصميمى و اللى عاوز السورس يقولى
ايه مكونات التصميم بقى
1- كاميرة ويب معدلة بفلتر يناسب الاشعة التحت الحمراء
2- زعنفة تبريد عشان الكاميرا لما هتشتغل على الاشعة التحت الحمراء لازم هتسخن
3- اسطوانة بطول البعد البؤرى للعدسة اللى جبناها
4- العدسة اللى جبناهاه و تكون كبيرة ( الكاميرا عليها عدستين كوارتز حطيت لهم عدسة بلاستك عشان موضوع الزيغ اللونى )
5- طبق توصل بيه بين جسم الكاميرا و الاسطوانة
6- سلك يو اس بى طويل 2 متر ( هنقص و نوصل بيه عشان نطول سلك الكاميرا شوية )
6.5- 3 انابيب هنبقى نركب فيهم كامل ليد انفرا ( عشان لو حبينا نطفى كشافات العربية كمان و نمشى فى الضلمة خالص و نعمل فيها عفاريت الطريق )
7- شوية ليدات انفرا زى بتاعة الريموت الليد ب 1 ج و كام مقاومة 100 اوم ب 5 قروش الواحده
هنعدل كاميرا الويب ازاى
1- هنفك الكاميرا خالص لحد اما نوصل للكارت بتعاها شوف الصورة رقم 2 الشكل 1
2- هنفك شباك العدسات و نتأكد انهم عدستين لو عدسة واحده مضغوطة غيرها لأنها مش هتنفع شوف الصورة 2 شكل 2 و شكل 3
3- بص شايف القطعة اللى بتلمع باللون الاحمر دية هيا فلتر اللى بيمنع الاشعة التحت الحمراء و تحتيه الاى سى بتاعة الكاميرا و دية فوقيها سينسور حساسيته رهيبة جدا لو خدشته بس هتدمره صورة 2 شكل 4
4-بحذر شديد جدا هنشيل الفلتر بتاع الاشعة التحت الحمراء و هيفضل لينا الاى سى بالسينسور اللى عليها شوف صورة 3 الشكل 5
5- نقوم بتنضيف السينسور من اى رايش نانوى بحقنة هواء و اوعى تلمسه صورة 3 شكل 6
6- هنجيب ورق بتاع الاشعة التلفيزيونية و ده هنفصل منه فلتر عشان نمنع الضوء العادى و نعدى بس الاشعة التحت الحمراء شكل 7 و بعد كده نركب الفلتر مكان الفلتر القديم اللى شلناه شكل 8
7- هنجمع الكاميرا و نقص السلك بتاعها عشان نطوله شوية نجيب سلك اليو اس بى و نقصه و نلحمهم فى بعض و نعزلهم كويس و احانا بنوصل بقى ناخد وصلة من الطرف الموجب و الطرف السالب لبره عشان هنوصل عليهم الليدات بتاعة الانفرا
8- نوصل ليدات الانفرا بالشكل ده
نجمع التصميم كله و هيبقى بالشكل ده و طبعا انتو تقدرو تزوقوه افضل منى بكتير انا على قد المتاح عملت
نختبر القطعة بقى و نجرب نصور بدون ما نفتح اى نور نعتمد على نور الشارع على البلكونة لأننا لما ننجح هنا هنقدر ننجح و احنا فى الشارع بشكل اكبر
دلوقت القطعة دية هتوصلها اما لو عندك شاشة فى العربية بتسمح بتركيب كاميرات عليها او انك تعمل زى ما بعمل لاب توب مينى يوصل على الكاميرا و يكون فيه نت و مزيكا و حركات و كمان توصله بعده فيها جى بى اس و تعرض بصورة كبيرة ده افضل و اقل فى التكاليف
هتركبها اما على الاسبويلر الخلفى او تخبيها تحت فى الاكصدام الامامى ( افضل عشان المرور) او تخليها على التابلوه او تعملها اى شكل روش و تحطها على الكبوت من قدام
لو حد محتاج مساعدة يقولى بالتوفيق