المشاركة الأصلية كتبت بواسطة idea4man
اريت لو تعرفوني المعلومات دي (مع العلم ان العربية فيرنا 2005 1600cc مانويال كاملة ):-
========================= ====================
1-ما هو زيت الماتور المناسب (نوعه واسمة ومسافته).
2-ما هو زيت الباور المناسب (نوعه واسمة ومسافته).
3-ما هو زيت الفتيس المناسب (نوعه واسمة ومسافته).
4-ما هو زيت الفرامل المناسب (نوعه واسمة ومسافته).
5-ما هو زيت الشنبر المناسب وهل هو بديل لزيت الماتور ام يوضع معه.
6-ما هي البوجيهات المناسبة للعربية.
7-ما هو منظف دورة البنزين الافضل - وهل منظف دورة البنزين هو منظف الرشاشات؟
8-ما هو الاسبراي المنظف للحساسات الافضل.
9-رادياتير المياه هل له منظف؟ وما هو اسمه؟ وكيف يوضع على الراديتير؟ وهل هو ذو جدوى ام لا؟
10-ما هو افضل فلتر للبنزين وللزيت وباقي الفلاتر.
11-ما هي عدد الكيلو مترات الطبيعي داخل المدينة وخارجها (مع استخدام بنزين 92).
مع ملاحظة أن:-
*اولا بالنسبة لسؤالى عن زيت الشنبر فده لان فيه ميكانيكي قالى ان المكنه خفيفة شوية (لان لقي ان فيه بخره بيضه خفيفة اوى بتخرج من خرطوم الفايض وفيه رشح زيت خفيف على المكنة ) وواحد تانى قال لا مش خفيفة وفية ناس زملاء بتفهم برده اتلخبط رايها ولكن اللى نصحنى قال عموما كدة او كدة ( غير فلتر الزيت وزود لزوجة الزيت وحط زيت شنبر ومتحطش زيت مسافة كبيرة يعني حط 3000ك او 1000ك بس وان ده بيحافظ على عمر المكنة فى الطبيعي)
*ثانيا بالنسبة للراديتير فانا مش عارف يعني اية انظفها ومش عارف ازاى انظفها كما ان فيه ناس قالت ان المياه الخضراء ملهاش اي لازم نهائيا بل قال ان كل اللى بيباع فى مصر غير اصلية
*ثالثا اما عن المنظفات فده لان اللى قبلي كان بيحط بنزين 80 كما ان فيه واحد قال ان ممكن يكون البخرة الخفيفة اللى بتخرج من خرطوم الفايض بسبب ان الرشاشت والبوابة عايزة تتنظف بس او ان نوعية الزيت اللى حطه مش كويسة
*رابعا بالنسبة للبوجيهات لانى قرات ان فية بوجيهات بتضرب بسرعه وان فيه بوجيهات ممكن تكون غير مناسبة للفيرنا من حيث رقمها وفيه بوجيهات ثنائية الشمعة وانا لا اعرف عن كل ذلك شئ
*خامسا بالنسبة لسؤالى عن معدل الاستهلاك لان انا فولت بنزين 92 والمؤشر الان وصل للنص بالضبط والعداد قرا الفرق بالضبط (96ك) فلو التانك بياخد 45 لتر يبقي نصهم 22.5 يبقي معدل الاستخدام كده 4.5لتر تقريبا - فاية السبب؟
الرجاء الرد عن خبرة وتجربة لانى لا املك معلومات نهائيا حيث ان العربية جديدة معى ولم اتعامل معها من قبل مع العلم ان المالك السابق كان يستخدم بنزين 80
برجاء سرعة الرد لضبط العربية وشكرا جدا
|
زيت الماتور المناسب لحضرتك بما ان المكنه خفيفة هو شيل هيليكس الاحمر بحوالى 75 جنية بيقعد حوالى 2000-3000
اى زيت باور مش فارق بس يفضل تشترى زيت الباور من اى بنزينه وطنيه بتاعت الجيش
زيت الفتيس حضرتك بتروح بنزينة وطنيه وخليهم هما يحطولك زيت الفتيس الكيلو فى حدود 20-30 جنية
زيت الفرامل المناسب لحضرتك اى زيت فرامل فى علبة صفيح وهاتها علبة كبيرة حوالى نصف كيلو اوعى تجيب زيت فرامل فى علبه بلاستيك
زيت الشنبر هو زيت تقيل جدااا بيتحط على زيت العربيه بمعنى الفيرنا بتاخد 3.5 كيلو زيت حضرتك بتحط 3 كيلو زيت عادى بتاع الماتور والنص كيلو الباقى بتحطه زيت شنبر مع العلم انه بيتباع فى عبوات حجم العبوه نصف كيلو و زيت الشنبر فعلا بيمنع الدخنه وبيظبط الماتور شوية لو الماتور خفيف بس ده حل مؤقت يعنى افضل حاجه لحضرتك تروح تفتح الماتور وتعمل عمرة او طقم شنبر حسب حاجه الماتور ولو لقيت ان الماتور محتاج حاجات كتير ممكن تشترى ماتور استيراد وتريح نفسك واحسن واحد بتاع استيراد فى القاهرة سوسو فى الهرم او فيهة واحد تانى برضوا ممتاز اسمه ناصر الطنانى فى طريق كورنيش حلوان بعد البنزينتين اللى فى المعصره
البوجيهات المناسبه بوجيهات NGK واحد شمعه ثمنها حوالى 50-60 جنية ومتجيبش بوجيهات ثلاثه شمعه ام 50 جنية لانها بتبقى مضروبه
نصيحتى بلاش تستخدم منظف بنزين لان لو التنك عندك مليان شوائب كتير والدورة مليانه هتسدلك الرشاشات فسيبها زى ما هى
بالنسبه لاسبراى الحساسات فحضرتك بتروح اى محل وبتقوله عاوز اسبراى حساسات مع العلم ان البيرسول ابو 4 جنية اللى بيولعوه فى الافراح بيعمل نفس مفعول سبراى الحساسات بس عموما ما دام الحساس باظ فمهما تحط فى سبراى او غيره كل ديه بتبقى مسكنات فقط تخفى المشكله فتره وبعدين ترجع تانى
راديتير المياه حله ان حضرتك بتروح لاى حد بتاع ردايتير وبيغسلك الدورة كويس وبيسلكلك الردايتير و بيحط مايه خضرا بس خلى بالك لو الردايتير بتاعك فيه اثار صدا لانك كنت بتستعمل ماية حنفيه على طول فاول ما هتحط مايه خضرا هتلاقى الردايتير بقى بينقط من كل حته وهتلاقى العربيه بالتالى بتسخن فنصيحتى متجيش جنب الردايتير ما دام العربيه مبتسخنش
مفيش حاجه اسمها افضل فلتر بنزين كله زى بعض بس عموما لو عرفت تجيب فلاتر هيونداى الاصلى يبقى احسن من الفلاتر الكورى بس بتبقى اغلى طبعا فى السعر بس صدقنى كله زى بعض مفيش فرق
بالنسبه لحساب عدد الكيلو مترات فملهاش عدد معين داخل المدينه طريقه واحده بس تقيسها بيها هى طريق سفر وتمشى على سرعة 90 يعنى تدخل بنزينه تفول لاخر الزور وتحفظ رقم العداد الحالى وتطلع على طريق سفر مفيهوش وقفه وتمشى حوالى 100 كيلو و ترجع تفول تانى وتشوف حطيت اد ايه لو حطيت 8-10 ليتر يبقى كده تمام والدنيا مظبوطه وعموما فيه حل احسن من ده كله انك تطلع البوجيه تبص عليه لو لقيت لونه احمر او ابيض محمر سنه يبقى كده تمام لقيته اسود فحمه يبقى العربيه بتاكل بنزين
بالنسبه ببقى لموضوع بنزين 80
فحضرتك متعملش كده لانه بيدمر الماتور لان ماتورك نسبه انضغاطه عاليه ولو عاوز تمشى بنوع وقود سعره منخفض حول غاز الغاز حاليا اكثر من ممتاز وحطوا له مواد بقت متخليهوش يضر الماتور زى زمان و غير كدا عمر الماتور اللى ماشى بالبنزين بقى مقارب جدااا للماتور اللى ماشى غاز يمكن يكون الاتنين عمرهم زى بعض ما دام الصبح بتسخن اول عشر دقايق بنزين وبعدين تمشى مشاويرك غاز وبعدين قبل ما تقفل العربيه تحول بنزين تانى لمده نصف دقيقة هتلاقى الماتور عمر معاك جامد مع العلم ان الغاز يكافىء بنزين لوكتين 95 ومش بيسقف مع الماتور خصوصا ماتور الفيرنا اللى انضغاطه عالى