[عصام غنايم]

انا نازل يوم 30 \ 6



ودى اسبابى

انا لا أطعن فى شخص الدكتور محمد مرسى الكريم ( حافظ القرآن مصلى الفجر )
ولاكن علاقته بربه له وليست لى ( المهم عندى آدائه على الأرض وليست علاقته بالسماء )

لا أطعن فى الأخوان ( جماعه محترمه منظمه )
ولاكن اقرف منهم لما ألاقيهم بيدافعوا على طول الخط بدون اى مراجعه للذات وبدون اعتراف بالخطاء
والأدهى والأمر انك لو تكلمت مع اخوانى فى شرق مصر فى قضيه ثم تكلمت مع اخوانى فى غربها فى نفس القضيه ( ستجد نفس الرد بحزافيره )

انا انتخبت مرسى فى الأعاده
ومع ذلك انا أثق تمام الثقه لو كان مرسى بيعيد امام ( شفيقه المغنيه ) كانت ( شفيقه ) نجحت
وايضاٌ لو كان شفيق بيعيد مع ( شفيقه ) كانت ( شفيقه ) برده نجحت
سبحان الله

مرسى رئيس شرعى
طيب لو فرضنا انك اشتغلت عند صاحب عمل كل يوم بيضيقها عليك فى اكل عيشك وكمان كل ما ياخد قرار يرجع فيه ومش عارف يحكم شغله ولا يتحكم فى عماله
هتكمل معاه ولا هتطفش ؟؟؟

طيب لو كل يوم حد يجى يأذيك وترجع لصاحب العمل ده يقولك اصلهم بيحاربونى
هتقوله ايه ؟
هتقوله ملعون ابوك على ابو اللى بيحربوك انا مالى يا عم سيبنى اعيش وروحوا حاربوا بعض بعيد
مش كده ولا ايه ؟

هيجى واحد يقولك انت مش بتتخلى عن صاحب الشغل انت بتتخلى عن المشروع الأسلامى
هرد عليه واقوله اسلامى مين يا حبيبى بأمارة ايه ؟
بأمارة القرض ( اللى هو ربا بين )
ولا بأمارة معاداته لدول الخليج المسلمه بإرتمائه فى احضان ( ايران الشيعيه )
و لا بأمارة جريه وراء روسيا والصين ( الشيوعيين )
ولا بأمارة خطابه الى رئيس وزراء اسرائيل ( صديقى العزيز المبجل )


البلد من فشل الى فشل ومن تخبط الى تخبط

انا هتكلم عن نفسى

بشتغل تمن ايام مبارك ( لعدم وجود شغل ولكساد الأحوال الأقتصاديه )

عشان امون العربيه بخش فى رحلة عزاب ( من 4 الى 5 ساعات من البحث والطابور )
عمرها ما حصلت ايام مبارك

النور بيتقطع عليا فى الشغل والبيت يومياٌ ( من 2 الى 3 ساعات )
عمرها ماحصلت

هتقولولى طيب نديله مدته كامله ( 4 سنين )
هقولكم البلد مع فشل الأداره الصارخ اللى احنا فيه دلوقتى صدقونى البلد نفسها مش هتكمل الأربع سنين

ثبت فشل ادارته من أول سنه
ثبت ضعف شخصيته
ثبت تخبطه

أديله سنه كمان ليه

فاضيين مثلا ولا غاويين بهدله ؟


لكل ما سبق

انا نازل يوم 30 \ 6