المشاركة الأصلية كتبت بواسطة AbOnOrA
موضوع مهم ومجهود كبير فى تلخيص اهم واكثر السيارات انتشاراً فى السوق المصرى اشكرك عليه
لكن اتحفظ على الكثير من النقاط فيه واتفهم موقف الكثير من الناس اللى ممكن متعرفش تعقب عليه لاحتواءه على اراء كتير ممكن تكون مش واضحة اوى او متباينة
فمثلاً السبيرانزا A516 ممكن تكون عربيه رخيصة او التوكيل عملها دعاية كويس لكن جودتها ديه اكيد محل خلاف
موضوع السكودا اوكتافيا ووصفك ليها بانها سيارة المانية ومقارنتك ليها مع اشقائها الالمان طبعاً فيه مغالطة كبيرة وهى ان العربيه مش المانى خالص ديه شركة تشيكية مملوكة لشركة المانية (فولكس) اللى ليها مصانع وشركات فى كل حتة فى العالم حتى الصين اللى بتعمل فيها بعض موديلات فولكس نفسها
وطبعاً ادائها لا يقارن بالسيارات الالمانية الاصيلة زى البى ام والمرسيدس والاودى
كمان بالنسبة للاوبترا فهى فيها عيوب تصنيع كتير وحتى فى المنتدى هنا بعض الامثلة والكلام ده ينطبق على شيفرولية الكورية عموماً اللى بتعتبر درجة تانية من الصناعة الكورية بعد هيونداى - كيا
طبعاً ارائك كلها محل احترام وتقدير منى والاختلاف فى الرأى لا يفسد للود قضية
|
بالنسبة للاسبرانزا 516 هيا زيها زي اي عربية ليها مميزات وعيوب
بس بصراحة انا شفت العربية اكتر من مرة وركبتها وبصراحة جودتها كويسة بس طبعا مش عالية اوي ودا طبيعي في الفئة دي
اما الاوكتافيا هيا فعلا الماركة نفسها تشيكي بس معظم المكونات الماني
عندك الشاسيه دا نوعه MQB ودا موجود في الجولف 7 والاودي A3
والماتور القديم 1600 موجود في الجيتا والجولف 6
اما الماتور الجديد 1400 TSI دا بقا موجود في معظم عربيات الاودي والفولكس
دا غير ان معظم المكونات الميكانيكية المانية
ومن الطبيعي ان اي شركة في العالم تجمع عربياتها في كل حتة في العالم علشان تكون قريبة من الاسواق وفي شركات كتيرة جدا فاتحة مصانع تجميع في الصين علشان تلبي الطلبات المتزايدة على عربياتها وفي نفس الوقت علشان تكاليف الانتاج هناك بتبقا اقل وطبعا الحتة دي بتهم جميع شركات العربيات بلا استثناء علشان سعر العربية يكون ارخص ما يمكن لكن طبعا دون التضحية بالجودة والمتانة
لكن بشكل عام الاوكتافيا اثبتت كفائتها وجودتها في السوق وانتشرت بطريقة كبيرة الفترة الاخيرة
اما الاوبترا انا سالت ناس كتيرة معاهم اوبترا وشكروا جدا فيها وبصراحة انا نادرا ما سمعت ان في حد شكى منهاومعظم الشكاوي بتبقا عادية وبتقابل اي حد اللهم الا موضوع وش السلندر اللي انتا نزلته في المنتدى من فترة بس دا محصلش عند معظم الناس