المشاركة الأصلية كتبت بواسطة مستر احمد الفهد
شكرا ليك يا ادمن سيد انت فعلا اخ كبير وهندسة ,العربية كانت زى الفل انا خلصت وتمام والحمد لله الفيات على القد لغاية ما اغيرها واهو بتعلم.احب اسالك لمبة البطارية كل ما اجى ادور تفصل بعد 3 ايام من السواقة الكويسة والنهاردة الكهربائى اللى بتعامل معاه قومها ببطارية تانية وحكيت لسمكرى معرفة قالى هاتلك بطارية جديدة علشان متكرهش الفيات وغير البوجيهات وطقم كهرباء العربية,ايه رايك؟
وعايز اعرف سعر البطارية وايه الافضل لو ناوى اجيب؟
ولك جزيل الشكر يا باشمهندس
|
انا بس عاوز افهم حاجه البطارية بتاعت حضرتك بتنام لما تركن العربيه ثلاث ايام ولا كل ثلاث ايام حضرتك بتسوق فيهم العربيه البطارية بتفضى شحن
على العموم لو فى الحالة الاولى ان العربيه البطارية بتاعتها بتنام بعد ثلاث ايام من الركنه فلازم حضرتك تعرف ان البطارية على الاقل ما دام العربيه مركونه حتى اسبوع المفروض البطارية متنامش يعنى لو حضرتك ركنت العربيه اسبوع ورجعت تدور المفروض لو البطارية تمام تدور معاك العربيه عادى طيب نفترض ان بعد ثلاث ايام من الركنه حضرتك تيجى تدور العربيه تلاقى العربيه البطارية بتاعتها نايمه هنا بقى لازم نتأكد هل ده عيب من البطارية ولا عيب من العربيه يعنى العربيه فيها حاجه ملمسه وبتستهلك من البطارية اثناء ما حضرتك بتركنها هنتأكد من الكلام ده ان حضرتك مثلا قضيت مشاويرك تمام وجيت خلاص هتركن العربيه تقوم حضرتك بعد ما تركن العربيه تنزل تفتح الكابوت وتشيل قواطيش البطارية (الاسلاك اللى متوصله فى البطارية ) وتسيب البطارية مش متوصله فى العربيه ثلاث ايام وحضرتك تيجى بعد ثلاث ايام توصل تانى الاسلاك بتاعت البطارية فيها وتدور لو العربيه دارت طبيعى بدون مشاكل والبطارية قدرت تدور العربيه يبقى كده عند حضرتك حاجه ملمسه فى العربيه وهى اللى بتستهلك البطارية عند حضرتك اثناء ركنة العربيه وبالتالى لازم تروح عند كهربائى شاطر يكشف لحضرتك فين مكان الحاجه اللى ملمسه وبتاكل البطارية ولازم تعرف ان البطارية عندك تمام طيب لو جيت بعد تلات ايام وصلت الاسلاك فى البطارية وجيت تدور العربيه العربيه مدارتش يبقى ساعتها البطارية اللى عند حضرتك بايظه ولازم تغيرها
نيجى بقى للاحتمال التانى
وهو ان لو حضرتك بتسوق العربيه كل يوم وبعد كل ثلاث ايام سواقه بتلاقى البطارية نايمه ومحتاجه تتشحن هنا بقى لازم تروح عند كهربائى كويس ومش لازم اللى بتتعامل معاه واحد تانى خليه يقيسلك شحن الدينموا بتعاعك لو قالك شحن الدينموا فوق 13 فولت لغاية 14.2 يبقى كده الشحن عند حضرتك تمام اووى وكده العيب فى البطارية انها مبتقبلش شحن خلاص وعمرها الافتراضى انتهى ولازم تغير البطارية
اما لو قال لحضرتك ان شحن الدينموا ااقل من 13 فولت يبقى ساعتها الدينموا هو اللى محتاج صيانه ومش بيشحن البطارية كويس
وعموما ننصيحتى لحضرتك تجيب بطارية جافه حتى لو اغلى من السائله وعموما افضل بطارية جافه هى Ac Delco وسعرها بالقديمه اخر مره سئلت عليها كان 360 بالبطارية القديمه