[حسام البورسعيدى]

بصى حضرتك دى كلها حاجات ليست ثوابت على الاطلاق ..

ودايما خليكى فاكره يا استاذه ايناس ان العربية دى مجرد اله تحت تصرفك .. وظروف الطريق هى اللى بتحكم القرار المناسب ... وعلى فكره الاساله اللى حضرتك ذكرتيها دى اجابتها ان لازم يكون فى بينك وبين العربية Sense ..


تمام ..

طيب بالنسبة لاسئله حضرتك :

لو عربيه هدت قدام حضرتك .. مبدئيا حضرتك بتدوسى فرامل بدون دبرياج .. اذا وجدتى ان سرعتك نزلت اوى بالنسبه للغيار اللى انتى عليه تدوسى دبرياج وتجيبى غيار اقل .. بمعنى ايه ..

يعنى .. نفترض حضرتك ماشيه على التالت بسرعه 60 مثلا .. واضطريتى انك تهدى لاى سبب (حفره - مطب - زحمه .. الخ) دوسى فرامل بس علشان تهدى .. اذا الطريق انفتح تانى من غير ما تهدى اوى كملى بنزين تانى .. اما اذا اضريتى مثلا تقفى او تنزلى سرعه قليله اوى غير مناسبه للتالت يبقى دوسى دبرياج علشان تنقلى لغيار اقل ... تمام كده ؟؟


المطب نفس الوضع برضو .. مبدئيا اغلب المطبات الافضل تتاخد على التانى .. تمام ..

طيب نفترض حضرتك ماشيه على التانى وفى مطب هيتاخد على التانى .. يبقى نهدى بالفرامل بس من غير دبرياج وناخد المطب ونكمل ..

طيب احنا مثلا على التالت او الرابع وفى مطب .. لا يبقى نهدى شويه قبل المطب بالفرامل بس وبعدين ندوس دبرياج ونجيب التانى وناخد المطب وبعدين نسيب دبرياج ونكمل ..


اللخبطه اللى عند حضرتك ان فى ناس لما بيعلموا حد (وخصوصا البنات) بيستسهلوا ويعلموهم يدوسوا دبرياج عمال على بطال مع كل فرمله .. علشان العربية متطفيش او تكركر منهم كتير .. وده غلط ..

الدبرياج وظيفته تغيير الغيارات بس .. فحضرتك اتعودى انك مش تدوسى دبرياج الا لو محتاجه تنقلى غيار فقط .. انما لو هتهدى على نفس الغيار يبقى فرامل فقط ...


لازم لازم لازم السنس بينك وبين العربية متنفعش بالحفظ كده علشان تبقى سائقة ماهره قريبا باذن الله .....