[حسام البورسعيدى]

لازم دلوقتى العربية تكون مش بتحدف يمين او شمال لو حضرتك سبتى الدريكسون سواء مع التسارع او الفرمله ..

لازم الدريكسيون يكون ثابت مش بيترعش فى ايد حضرتك سواء على السرعه العادية او السرعات العاليه (فوق 120)

لو فى اى مشكله من دول يبقى نطلع على مركز زوايا وترصيص محترم وهما هيقوموا بالازم ...

عربية ماشيه 20 الف كيلو استحاله تحتاج تغيير فى ديسك او اسطوانه ..

بالنسبه لتقل الفتيس انا شايف انها حاجة مش طبيعيه مع الفيرنا اللى فتيسها معروف انه خفيف جدا ..

بس انا اتوقع ان المشكله هى عدم تعود من حضرتك بس .. خصوصا لو كنتى بتتعلمى على عربية قديمه وفتيسها سايب ..

هو لازم يكون فى مقاوه وتكات فى عصا الفتيس عند النقل لان دى تروس بتعشق فى بعض وده شئ طبيعى بس المهم ان الغيار يكون سلس ومش بيعصلج مع حضرتك او بتسمعى اى اصوات حشرجه (لازم ندوس دبرياج للاخر عند نقل الغيار) ..

اذا كان وضع الدبرياج مش مريحك يعنى لو هو واطى او عالى ممكن تظبيطه بكل سهوله ب 5 جنية عند اى صبى ميكانيكى .. هو مجرد رجلاش فى الدواسه بصاموله تعليه او توطيه حسب ما حضرتك تفضلى وان كان الوضع الافضل هو ان يكون مضبوط فى نصف مشوار الدواسه للحفاظ لاقصى حد على عمر الديسك والاسطوانه ...

احيب اضيف لحضرتك معلومه الديسك والاسطوانه لهم اعراض لتلفهم (عمرهم الافتراضى دائما مش اقل من 100 الف كيلو مع القياده الهادئة الطبيعية)

ضعف سحب العربية وتسارع الـ rpm بدون زياده السرعه (عيب اسطوانه)
رجرجه ملحوظه عند الطلوع على الاول (عيب ديسك)
احيانا يحدث صوت احتحاك او ونه يزول مع ضغط الدبرياج وده بيكون عيب بليه دبرياج ..

طقم الدبرياج كامل اوريجينال بحوالى 510 جنية وانصح بتغييره كامل عند تلف اى اجزاؤه ..

طقم الدبرياج الفاليو اعتقد تمنه فى حدود 370 جنية ... ولا انصح بيه خصوصا الاسطوانه لانها تختلف عن الاوريجينال (اضعف منها) وده بيبان بالعين المجرده لو نظرنا على سوست الاسطوانه الاصليه والفاليو نلاحظ ان الفاليو السوست ارفع من الاوريجينال ...

دى مجرد نصيحه عن تجربة لكل ملاك الفيرنا ..


والف مبروك على العربية يا فندم ربنا يديكى خيرها ويبعدك عن شرها وشرور الطريق باذن الله ..

تحت امر حضرتك فى اى استفسارات ....