احييك يا استاذ بدر علي الموضوع الشيق
انا ببقي ذوق مع الذوق و عديم الذوق مع قليل الذوق كمان
بمعني اني لما بلاقي قدامي حد محترم سواء ملاكي او ميكروباص او تاكسي ببقي كويس معاه.
لكن لما الاقيه قليل الزوق بعمل اقصي ما في وسعي علشان اعلمه الادب و انه ما يحاولش يعمل كده تاني
مره مثلا سواق تاكسي جه عدي قدامي بطريقه بايخه
اديته كلاكس و نور لقيته بيشوح بأيده من جوه التاكسي
انا بقي اتغاظت منه خصوصا اني عارف نظره سواقين التاكسي لسواقين الملاكي
يقولك دا ما بيعروفش يسوقوا و احنا ملوك الطريق و دا مامي جيباله العربيه و ما الي ذلك
من الكلام اللي بنسمعه من تلك الافراد الحاقدين علي ركاب الملاكي
المهم اول ما لقيته مش عاجبه يدوب لقيت مكان فاضي و عديته
هو حاول يعدي بعد كده بس كنت بكسر عليه بغباء كأنها مش عربيتي
لحد ما فضل ورايا و ايه كمان
خايف يعدي من جنبي !!!!
كل شويه افتح ليه الطريق و اسيبه و برضه مش عاوز يعدي
اهو مثلا الاخ دا لو كان طلع ايده و قالي شكرا او معلش كنت حسيبه عادي جدا
انما دا قليل الادب
عندك بقي سواقين الميكروباص او البيجو علي الطريق
و دول مافيش العن منهم
تلاقيه جاي من ورا بيجري و المسافه بينه و بين العربيه اللي في حارته توصل لمفيش
تلاقي بيدي اشاره و عاوز يعدي قدامي بالقوه
اعتبارا برضه ان سواق الملاكي حيسيبه يعدي كده و خلاص
النوع دا استحاله اعديه مهما عمل و افضل مدي في كلاكس و ازعجه
يقوم البيه من بجاحته يطلع ايده من الشباك و يقولي عدي عدي
يعني يبقي طريقي و حارتي و هو كمان اللي مش عاجبه و يقولي عدي.
دي انماط بسيطه من اللي الواحد بيشوفه في الشارع
دا علاوه بقي عن اللي بيجي مخالف و دا التصرف معاه ظريف جدا
لو بالليل انور العالي في وشه و اقرب منه بالراحه و احسسه اني داخل فيه
و برضه اكون سايب مسافه لنفسي اعرف اتحرك بس لازم اخوفه شويه
عندك بقي سواقين النقل الكبير و علي رأي المثل من حق الكبير يدلع
و احترام الكبير واجب
و كل تلك العبارات التافهه اللي بيكتبوها علي عربياتهم
دول بقي الهزار معاهم بيبقي تقيل اوي و ما ينفعش حد يجي ناحيتهم
الا لو عرفت تيجي قدامه و تلجمه و تخليه يمشي بالراحه بس
عاوزه حذر و عينك علي المرايه ومسقط غيار و ال rbm عالي علشان لو حسيت انه حيخبطك
تعرف تجري قبل ما يجي ناحيتك
ااااااااااااااه
الواحد لو حكي مش حيكفيه صفحات و صفحات من عمايل السواقين دول
المفروض يتاخد الرخص من كل الفئات المهنيه دي و يتعاد امتحانهم من اول و جديد و يتشدد عليهم
علشان يتعلموا السواقه صح و يعرفوا ان الله حق