[magdy_c_c]

بص يا عم وائل واضح ان الجماعة لما بيتزنقوا
يقوموا على طول قايلين الفئة المندسة و الطرف الثالث و الصباع الثالث و الظافر الثالث و الودنة عارفها اللى هى بتطلع فى الصباع دى آه
بكرة هيبقى فى الودنة الثالثة باردوا
الفيديو واضح وصريح و بيوضح قلة أدب وسفاله و وساخة الفشلة اللى بيتوعدوا بالضرب و الذبح
و الشخـ..... و الله عيب دول اخوان مسلمين دول ؟؟؟؟!!!

المشاركة الأصلية كتبت بواسطة kj1

هم دول اللى احنا بنحبهم
هم دول اللى احنا عاوزينك زيهم
هم دول اخواتنا و اخوات كل المصريين
هم دول المسلمين اللى بيخافوا على وطنهم بجد
هم دول اللى قلوبهم عمرانة بالايمان والاسلام الحقيقى بيجرى فى دمهم
دول مش بيدوروا على جاه و لا سلطة و لا بيجروا ورا كرسى
دول مش بيعملوا نهضة مزيفة مش موجودة دول بيحاولوا يحققوا العدل
و الله انا نفسى ربنا يهديكم كلكم و تبطلوا تكذبوا و تحوروا و الله لو قلوبكم مليانة خير و بتحبوا الخير فعلا ً كنتم سمعتم لآراء غيركم من ذوى الخبرة و الكفاءة لو كنتم عاوزين البلد دى تنهض بجد كنتم تنازلتم عن الطريقة الهمجية بتاعتكم فى مناقشاتكم الغير موضوعية كنتم سمعتم للكل
الكبير و الصغير الرجل و الست الولد و البنت
كل اللى انتم عملتوه انكم قعدتم تحفظوا اجابات على أسئلة الشعب
س: ما انجازات محمد مرسى ؟
ج : المعارضة مش سايباه يشتغل
س: فين وعود الـ 100 يوم اللى اتكلم عليها الرئيس ؟
ج : عيب ما تتكلمش عليه كده انت حامل لكتاب الله زيه
س: هنقول نعم ولا لا للدستور؟
ج : هنقول نعم علشان العجلة تدور
س: بس الدستور فيه عوار و مش كل الناس موافقة عليه
ج : هو يعنى كان قرآن أى دستور فى العالم طالما مش منزل من عند ربنا هيبقى فى اختلافات عليه
س: انتم بتضربوا المعارضة ليه ؟
ج : ده الطرف الثالث و الفئة المندسة
س: ازاى تضربوا البنت عند المقطم ؟
ج : و هى ايه اللى خلاها تطلع من بيتها
س: بتضربوا المتظاهرين ليه عند مكتب الارشاد ؟
ج : لو انت حد اتعرض لك عند بيتك هتعمل فيه ايه
س: بس احنا شوفنا فيديوهات كتيرة تؤكد ان الثوار عزل و كانوا بيرسموا بس
ج : لا دول بلطجية و كان معاهم حجارة ومولوتوف و أسلحة بيضاء و سنج و مطاوى و سيوف
و الاعلام الفاسد هو اللى كان بيصور الأمر على اننا احنا المعتدين
س : أيوة بس دول كانوا قلة و انتم كان عددكم ما شاء الله كتير
ج : لا ده كان فى اتوبيسات مليانة بلطجية بالمولوتوف و الأسلحة و الخرطوش الناحية التانية
و الاعلام الفاسد بتاع الفلول ما جابش الصورة كاملة
.....................
......................... .......
......................... ..................
انت عارف و الله لو ضيعتوا وقتكم فى حاجة مفيدة
أو حاولتم تتعلموا من ذوى الخبرة و الكفاءة و الله هنبقى أحسن بلد فى العالم
اتنازلوا بس عن التمكين و ادوا البلد فرصة حقيقية للنهوض بها
اتنازلوا عن مصالحكم الشخصية و حبوا البلد شوية
على فكرة انا ضد ان محمد مرسى يمشى دلوقتى بجد البلد مش ناقصة بس أنا نفسى يتنازل عن سياسة الجلد التخين بتاعته دى و يجمع حواليه العلماء و المفكرين و السياسيين و يحاول يرجع تانى المستثمرين و يفكر فى القرار قبل ما يخبطه و خلاص
و الله لو استعان بأهل الخبرة مش أهل الثقة فى الجماعة و الله البلد ممكن يتقام لها قومة تانى
عندنا خبرات و كفاءات عظيمة مش موجودة فى أى مكان فى العالم
بعد الثورة طلع كل ذوى الخبرات و الكفاءات و بجد كنا عندنا أمل عظيم اننا نبنى بلدنا من جديد
كل واحد فى مجاله كان بيجتهد انه يقدم أو يبتكر حاجة جديدة يقدمها لبلده من غير مقابل
و لكن الكل اصيب بالاحباط من الأداء الفاشل بتاع الريس صاحب مشروع النهضة المزيف
الناس عاوزة تنتج بس مشغولة بلقمة العيش ، عاوزة تبدع بس طول النهار واقفة فى صف طويل علشان أنبوبة بوتاجاز و لا تمون سولار و لا بنزين ، عاوزة تبتكر بس طول النهار بتلف فى الصيدليات على الدواء مش لاقياه
مع أن كل ولاد الدقون ركبوا عربيات زيرو فارهة و عاشوا عيشة مستريحة و مش بيفكروا فى البلد خالص
احنا مش عاوزين العيشة الفارهة بس على الأقل وفروا لنا العيشة الكريمة
عاوزين ننتج و نبدع و نبتكر بس ما تشغلوناش برغيف عيش و لا أنبوبة بوتاجاز و لا لترين بنزين نقف عليهم طول اليوم !
كده مصر بتضيع و الله مش هنلاقيها تانى
و العالم كله بيتفرج علينا
عليه العوض و منه العوض
و حسبى الله فى اللى ضيع أحسن و أطيب شعب فى العالم