[borio1704]

المشاركة الأصلية كتبت بواسطة svneleven أولا شكرا جزيلا علي المشاركة و هو ده اللي أنا كنت عاوزة أن احنا نبدأ ندخل في معادلات مش مجرد كلام مرسل. أولا بخصوص التروس أظن أن الترس الأول هو أكبر ترس مش أصغر ترس زي ما حضرتك ذكرت و طبعا الثاني أصغر و هكذا و متفق مع حضرتك أن الأول بيدي عزم أكبر و سرعة أقل و ده من العلاقة البسيطة بتاعة التروس لكن حكاية أنه يدي تسارع أكبر مش عارف. بخصوص السرعة الخطية أظن هي مضروب المحيط (مش القطر) في السرعة الدورانية يعني مثلا لو العجلة بتعمل 100 RPM يبقي هنضرب ال 100في 60 عشان نجيب عدد اللفات في الساعة و بعد كده نضرب الكلام ده في محيط العجلة (بالكيلومتر) و بكده نكون جبنا السرعة الخطية ب كم/س. باقي الكلام عاوز كباية شاي و أرد عليه لكن الكلام بدأ يحلو.

الكلام ده فعلا عايز كباية شاي

بص يا سيدي... عشان ما نتلخبطش... لازم الأول نعرف إيه هو العزم

باختصار ... العزم ده تقدر تعتبره القوة الدورانية... وبتتحسب عن طريق ضرب القوة المحركة في المسافة إلى مركز الدوران



دي هي نفس الفكرة اللي بيتولد بيها العزم داخل المحرك




كده عمود الكرنك بقى فيه عزم... اللي هيتنقل بعد كده لاسطوانة الدبرياج ومن ثم إلى العمود الرئيسي داخل صندوق التروس



التروس اللي راكبة على العمود الرئيسي هتحول العزم إلى قوة خطية



وبالتالي مقدار القوة الخطية دي يختلف باختلاف المسافة (نصف قطر الترس)

كل ترس من دي إسمه الترس القائد (Driver) .. لإنه بيقود الحركة، والتروس اللي هتستلم الحركة إسمها (المنقاد Driven)



يبقى نفس القوة الخطية الناتجة من الترس القائد هتتنقل إلى الترس المنقاد، ولكن العزم عليه قد يتغير باختلاف نصف قطره



في علب التروس... أبطأ نسبة تعشيق هي اللي فيها أصغر ترس قائد مع أكبر ترس منقاد... والعكس صحيح



طيب ليه بناخد أكبر عزم من النسبة البطيئة؟

بافتراض إننا ثبتنا سرعة الدوران... يبقى العزم الخارج من الموتور له قيمة محددة
والترس القائد في علبة التروس هيتنقله العزم ده بالكامل... ولإن نصف قطره صغير جدا... فالقوة الخطية الخارجة منه هتبقى كبيرة جدا



في المقابل... القوة الكبيرة جدا دي هتتنقل للترس الكبير (المنقاد) ... ولإنه قطره كبير، فالعزم الناتج منه هيكبر أكتر لإن القوة اضربت في مسافة أكبر

وبالتالي ... العزم الناتج هيقل كل ما عشقنا نسب أسرع



طيب... إيه اللي بيحصل للعجل لما نكبر قطره؟؟؟

العجل هنا نقدر نعتبره زي الترس القائد

وهنفترض إن العزم اللي جايله ثابت... يبقى القوة الخطية اللي هتتطلع منه هتصغر كل ما كبرنا قطره

القوة الخطية هنا هي اللي بتتنقل للشارع عشان تحرك العربية




يبقى القوة الفعلية اللي بتحرك العربية بقت أقل، وبالتالي التسارع هيقل

يا رب أكون قدرت أبسط المعلومات بالشكل الكافي


لو عايز معلومات مفصلة... تقدر تدخل على الرابط ده:
http://craig.backfire.ca/pages/autos/horsepower



...