السلام عليكم يا أهل المنتدى ... ربنا يديكم الصحة كلكم و يوفقكم و يوفقنا ...
نخش بقى في الموضوع على طووووووووول ... المهم
في يوم السبت اللي فات دة الموافق 2 مارس هههههه اللي اصابت فيه بعض سكان المحروسة ساعة نحس مستعر ... كان العبدلله على طريق المنصورة راجع القاهرة و و سايق على سرعة تتراوح بين 80 و 130 كم ... و الغيارات سلسة ... و حاطط على بتوع الميكروباص و النقل ... المهم الطريق دة مليان مطبات رخمة بلا ضابط او رابط ... هديت السرعة خالص و داخل على المطب و العربية تقيلة طبعا راجعين من البلد
لسة بادي العربية الغيار التاني الاقيها مش عاوز تجيب الغيار و داخل على المطب احاول اجيب الاول برضوا مفيش ... طيب التالت مفيش .... المهم رفعت رجلي من على الفرامل و سيبت العربية على سرعة خفيفة يدوب عدت المطب و ركنت يميني احاول في الفتيس ابدا موووووووور و بس ... بطلت العربية و حاولت اجيب الغيارات مفيش برضوا ... المهم شاء ربنا انها تجيب الغيار الخامس بزرجنة و بعد منها الغيارات اشتغلت ... دورت العربية و حطيت العربية على الاول قام الفتيس فررر لحظة و خلص الصوت ... طلعت بالعربية مش مستوى قوة عربيتي الطلعة دي ... طبعا الحاج ابويا ربنا يديه الصحة عمال يقنع فيا ان العربية طبيعية و ان دي زرجنة فتيس و هتعدي ... المهم مطب في التاني و سحب العربية قل جامد و بقيت بطلع من العربيات الملاكي بصعوبة لم اعهدها من قبل ... خلص الطريق و داخل على طريق مصر اسكندرية من ناحية كوبري بنها لأول مرة اطلع الكوبري دة بالسرعة دي اللي هي 40 و على الغيار التاني و الموتور بيزعق و 5000 دورة في الدقيقة ... المهم قلت ساعة شيطان و العربية بتدلع ... عديت الكوبري و ماشي بالعربية على 80 و مش عارف اجيب اعلى منها على الغيار الرابع ... اتأكدت ساعتها ان العربية عطلانة .. و لو دخلت بيها القاهرة هتبقى معجزة من المولى عز و جل ... و ان انا كدة باحرق على الاسطوانة رغم ان مفيش ريحة شياط الاسطوانة
... المهم ما بهدلش الحاج و الحاجة معايا .. المهم دخلت المؤسسة العربية ماشية على 40 بالعافية ... وصلنا محطة كهرباء شبرا العربية بتخسع و الموتور شغال و التكييف شغال و كهرباء العربية شغالة يعني وظائف الموتور طبيعية ... الحاج قرر يستلمها لخبرته الطويلة في القيادة ... و عمال يتريق اني مش عارف اسوق عربية ... طبعا استسلم و معرفش يسوقها ... كمل سواقتها شوف انت كنت سايقها ازاي ... و جت عند ميدان المطرية و خسعت خالص و الحاج نزل يزقها لحد اما اتحركت و طلعت كوبري الحلمية بالعافية في معجزة كونية ... وصلت بيها البيت و اتشاهدت 3 مرات لوصولي بالسلامة انا و اسرتي ... بس قلبي يحترق على صغيرتي الحبيبة ذات اللون الاحمر
... ذراعي اليمين التي ابطش بها في وجه سائقي الميكروباص عديمي الرحمة ... ماستحملتش اشوفها عطلانة جريت جبت 2 ميكانيكيا و كلمت مركز الصيانة غبور العبور طلبوا مني اجيبها في اسرع وقت ... الميكانيكيا احتاروا فيها و رفضوا يحطوا ايديهم فيها و خصوصا انها لسة مكملتش 2500 كم ... المهم قررت اعمل بيها رحلة اخيرة لمركز الصيانة و في ذلك اليوم المنحوس و بعد اما مشيت جسر السويس و هو فاضي في ساعتين و بعد عبور كوبري العاشر في معجزة مجرية عظمى قررت صغيرتي التوقف عن الحركة و قلبها مازال ينبض بالحياة
... طبعا قطرتها لمركز الصيانة و هناك استمر مسلسل حيرتهم .... دة يقول اسطوانة ... و دة يقول زور فتيس ... و انا اقول بلية دبرياج او عمود درايك لأن العربية لسة 2500 كم ... و النهاردة كلموني و قالوا لي الاسطوانة محروقة ... و انا كنت متأكد انها محروقة لأني مشيت عليها ما يقرب من 80 كم و العربية مش بتسحب ... و متأكد ان العربية فيها عطل تاني ... و طالبوني بدفع 1600 جنيه مصري لا غير قيمة طقم دبرياج كامل
انا كدة حكيت بالتفصيل الممل و حاولت ارفع عنكم الملل
السؤال هو :
1 - ما هو سبب حدوث تلك المشكلة اذا علمت ان السيارة لم تقطع سوى اقل من 2500 كم
2- ما هو ردكم القاطع على الـ 1600 جنيه
