المشاركة الأصلية كتبت بواسطة tefa_memo
السلام عليكم ورحمه الله وبركاته
من كام يوم كده واحد صاحبي كان مسافر اسكندرية وركن في شارع جانبي علي الكورنيش في العصافرة (( مكنش يعرف طبعا اسم المنطقة )) وراح كام مشوار علي رجله في خالد ابن الوليد يتسوق بعد ما واحد وصفله ازاي يروح خالد ابن الوليد ولما خلص قال يروح يجيب العربية عشان يروح ........
لغاية كده كلام زي الفل ......!!
طبعا لان الشوارع ع الكورنيش زي بعض مخدش باله انه يميز الشارع بأي حاجة عشان تسهل عليه لما يرجع ياخد العربية .....وفضل حوالي 1.30 يدور في الشوارع ع العربية لغاية لما كان هيجيله احباط بكذا حاجة (( اما انها اتسرقت - او اما انه مش عارف يوصل لمكانها وتاه عنها ))
المهم فرك المنطقة كلها لما خلاص يعني استوي ويدخل شارع يلاقي نفسه طالع في نفس المكان اللي كان فيه بس من شارع تاني جانبي لغاية فين وفين لقاها راكنه في شارع جانبي ياااااه زي ما يكون شم نفسه المهم عرف بعد كده ان المنطقة دي اسمها العصافرة بعد جاد بكام شارع ... لدرجة انه كتبه في اندكس عشان يعرفه بعد كده لما ينوي ييجي ولو اني اشك انه هينزل لواحدة تاني من غير ما يكون معاه حد دليل من اللي يعرف اسكندرية كويس
فبصراحة الموقف ده ممكن حد فينا لاقدر الله يتعرض له وخاصة لو مسافر بلد اول مرة تروحها او مش حافظ شوارعها
فيا ريت اي واحد بيركن عربيته في مكان جديد يميزه بأي حاجة او يكتب اسمه ع الموبايل او حتي اي محل موجود فيه او عمارة مميزة ....الخ تجنبا للوقوع في نفس الموقف لاقدر الله
وفقنا الله لما يحبه ويرضاه
|
حصلت لي مرتين الصراحة مرة كنت راكن في باركينج من اللي جمب سيتي ستارز اللي في مدينة نصر وكنت انا ومراتي وكان ابني لسه مولود بيتشال يعني وكنا داخلين سبينس المهم طلعنا من باب تاني وطبعا معانا الشنط ونلف وندور على الباركينج لفينا حولين سيتي ستارز مرتين من بره وطبعا الناس عارفه مساحته اد ايه
المرة التانية كنت في مشوار في الزمالك وركنت العربية جمب سفارة اهوة معلم الشارع اهوة ووقفت هزرت مع عسكري الحراسة اللي واقف وزي الفل اهوة انا ركنت امتي العصرية حلو الكلام عقبال ما خلصت مشواري كان بقى بليل متأخر والمحلات قفلت والمعالم اتغيرت ودور بقى يا معلم على سفارة في الزمالك يالهوي ساعتين بدور على العربية وكان معايا واحد قابلته في المشوار قولتله هوصلك يقولي خلاص سيب العربية وناخد تاكس ايه الاقتراح اللي يودي في داهية دة ههههههههههههههه
بس الصراحة حركة بتوقع القلب