اخوانى الاحباب
يوم السبت اللى فات طلعت فى دماغى الف لفة على الصنيعية بسيارتنا المصون ( لوزة ) واعملها شوية صيانة وخصوصا ان ربنا كان رزقنا بقرشين زيادة قلت اعوضها عن التاخيرات فى الصيانة الكتير
فقلت اقولكم ايه اللى اتعمل وبالاسعار يمكن حد يستفيد من اليوم الممتع
ده المهم
ابتدينا اليوم الساعة 1 ونص ظهرا وكان اول محطة عند بتاع الكربراتير لانه كان بيهبب البوجيهات
المهم رحت لبتاع الكربراتير عمل تنضيف وصيانة واتكلفت 55 جنيه بالظبط
ومن عنده وطلعت على السمكرى ربطلى الاكصدام والكبوت وظبطلى الكبوت وكان فيه شرخ صغير عند المفصلة واتكلف مصنعية 20 جنيه ومسامير ب 5 جنيه و5 جنيه كمان اكرامية
من عنده وطلعت على عم احمد الميكانيكى رفع الدبرياج و مغير طقم كهربا جبت الابلاتين والكوندينسر والبوجيهات ب65 جنيه ومصنعية 20 جنيه و10 اكرامية
لاقيت الوقت لسي بدرى معايا بينى وبينكم قلت ياود اطلع كمان بالمرة على الكهربائي ورحت رايح لعم حسن قلتله فك المارش علشان كان فيه ونة ومشكلة ترس هى مكنتش موقفانى بس قلت بالمرة واهو جاية برزقها
المهم اتكلفت عند عم حسن 50 جنيه و جبت جلبة كمان ب10 جنيه
واناماشي من عنده لاقيت مصطفى العفشجى بيقفل عربية فى ايده قلت ياود بالمرة ظبط الكبالين علشان بدات بتطقطق
شافها قالى لازم تتغير جبت جوز ايطالى ب200 جنيه لانى مالقتش الصينى واصلا اخر مرة الصينى مكملش معايا 6 شهور على بعض مطولش عليكم جبت الايطالى ب200 جنيه ومصنعية 40 جنيه
وبالمرة رحت مشترى كمان طقم ضفر اللى بتركب على الاكسدام النيكل دول الاربعة بمساميرهم عاملين 20 جنيه
بعد الحمد لله ما خلصنا الصنايعية وربنا كرمنا ولوزة بقت عروسة قلت مسك الختام بقى اغير زيوت
رحت طالع على بتاع الزيت
وانا كنت قريت هنا فى المنتدى موضوع عن ان احسن زيت للعربية التعاون الSJ
قلت اجربه بدل الموبيل الاسو اللى كنت بستعمله والاتنين سعرهم قريب
جبت الزيت ب 88 جنيه وزودت زيت الفتيس الحسبة كلها 109 + 5 اكرامية
بس عرفت ان الموبيل الاسو اللى كان ب75 جنيه غلى بقى ب90 جنيه ( معلومة على الماشي )
بس الصراحة حسيت فعلا بفرق روعة فى العربية كلها من صوت الماتور للسحب للجرى للثبات للحدفات كله بقى ممتع
وبينى وبينكم فعلا بقالى يومين بستمتع وانا ماشي بلوزة بعد ما كانت رحلة عذاب
وده كان يوم السبت اللى فات يوم من ايام لوزة الغالية وانشاء الله النهاردة اروح اجيب فردتين كاوتش امامى بالمرة علشان يبقى كدة خلصت اللى فى جيبي وارتاح
اصل اخوكم من النوع اللى الفلوس بتاكله
وانشاء الله اقولكم على سعر الكاوتش ونظامه ايه لما اجى من هناك
: CONGRA~238:
دمتم بود