[NeroOo]

السلام عليكم ورحمه الله
ازيكم يارب يكون الحال تمام

انا جايبه عربيه جديده هى مستعمله بس جديده بالنسبالى طبعا وهى اول عربيه اجبها فيات 127 توب المانى .. وكالعاده كاى عربيه مستعمله بيطلعلى كل شويه حاجه فيها اما بشد فى شعرى

و بتعلم السواقه جديد طلعت بيها الطريقه النهارده و دخلت فى تاكسى بالعرض وانا باخد الملف هو زنق نفسه بين الرصيف وعربيتى وهو غلطان .. بس انا برضو للحظه او لثانيه من الوقت نسيت ان فيه اختراع اسمه فرامل او دبرياج لفصل الحركه وبقيت مش عارفه اعمل ايه لا عارفه اطلع ورا علشان يعدى ولا ادام والعربيه بطلت ومبقتش عاوزه تدور و الناس كلها عرضت عليا المساعده الحمدلله ربنا ستر ..

انا محبطه جدا من الموقف دا .. حاسه انى مش هعرف اسوق بحس انى وانا فى العربيه بتعامل كأنى ماشيه على رجلى مش كانى سايقه عربيه وممكن ناس لا قدر الله يجرلها حاجه بسببى او يجرى حاجه لحد راكب معايا لان كان معايا والدتى

مش عارفه ده توتر خوف ام استهتار او عدم تركيز او كل ده مع بعض ده غير تريقه الرجاله اللى معديه جنبى وعدم مراعاه انى لسه بتعلم منتهى قله الذوق و التخلف .. وكانى علشان بنت ماليش حق السواقه .. وتريقه على العربيه علشان صغننه .. وادى اشاره محدش يحترمها ويعدوا عادى جدا مع انى ببقى خايفه على الناس اكتر من نفسي

قررت انى انزل بكره الجمعه امشى فى الشوارع مع مدربه السواقه على عربيتى المره دى لانى خدت كورس على عربيه المركز واما جيت اسوق عربيتى حسيت انى مش عارفه اسوق وربنا يستر

ومشكله تانيه بقى قصدى عاشره :D الغيار مبيجيش بسرعه بجيب الاول ومبعرفش اجيب الباقى مش سلس معايا انا بقول اغير عصايا الغيار .. ولا ايه رأيكوا ؟؟

ايه نصايحكوا و ادعولى