السلام عليكم أولاً.. أنا عايش في القاهرة بس نصي التاني إسكندراني من ناحية والدتي و أهل والدتي كلهم عايشين في إسكندرية و لغاية وقت قريب كانت سفرية إسكندرية بالنسبالي كأني رايح الشارع اللي ورانا!
لكن من حوالي ثلاث أو أربع سنين بقيت باحس إن إسكندرية مابقتش زي الأول يعني الزحمة كانت في الصيف بس بسبب إخواتنا الفلاحين
و كانت في أماكن معينة زي خالد بن الوليد و الأماكن اللي فيها شواطئ شعبية.. و بعدين الزحمة في الصيف تطورت و بقت طول الصيف و في كل حته و التطور الأخير إن البلد بقت على طول زحمة.. صيف و شتا و في كل مكان
.. مشيت على البحر أو الترام أو أبو قير مافيش فايدة زحمة السنين.. كان زمان الواحد لما يحب يروق أعصابه ينزل إسكندرية و أروح شقتي في عمارات العبور-شارع ونجت و أنزل أتمشى برجلى أو بالعربية و عندي مليون مكان أكل فيه أكل ماحصلش.. فطير من دهب, كبدة من الفلاح, أسماك من حودة أو شعبان أو بلبع
.. لكن دلوقت للأسف سفرية إسكندرية بقت تقيلة على قلبي و باتمنى مايحصلش أي ظروف عائلية تضطرني أنزل.. المشكلة فيا ولا في البلد؟! هل أنا بافتري عليها ولا هي اللي غلطانة.. نفسي يا اسكندرية ترجعي زي زمان بس قول للزمان إرجع با زمان
