المشاركة الأصلية كتبت بواسطة lolyta
يعني اخليني في الافيو علشان اعادة البيع مثلا وقطع الغيار على الرغم من عيوبها الي انا معرفهاش برضو قوي
|
والله بصي أنا هاكون صريح معاكي.. أنا معايا أكسنت الشكل القديم موديل 2006 فيها موتور Elantra موديل 2005 أوتوماتيك.. قبلها كنت راكب سيتروين C3 Full option و كمان فتيس تيبترونيك و ما أدراك ما الستروين.. ثبات رهيب و رفاهية زيادة عن اللزوم و أوبشنز بلا نهاية من أول التكييف الـ Touch لغاية مثبت السرعة ولكن... في مرة إحتجت أعمل صيانة و غيرت طرمبة البنزين لقيتها بـ 1350 جنيه و كمان معمول معايا فيها واجب
!! و كمان صيانتها عند ناس معينة يا إما في التوكيل و كل أعضاء المنتدى عارفين كده ده غير سوقها اللي نومه أتقل من نوم الفيل!! .. سألت على باقي قطع الغيار و مش هاقولك غير مثلاً إن علبة الدريكسيون مش موجودة غير في التوكيل و بـ 18000 جنيه!! و دي مش معلومة من منتدى ولا من أي حد دي معلومة من التوكيل نفسه.
المهم و بإختصار أنا إيه اللي يخليني أحشر نفسي مع عربية في بلد مابتقدرش قيمة العربيات المحترمة.. معلش أنا ممكن أركب عربية شعبية زي الأكسنت أو الفيرنا أو الأفيو و في النهاية أنا برضه راكب عربية لا تقارن بالأوروبي لكنها برضه مش صفيحة يعني! و بعدين لو عايز أبيعها في نص ساعة فلوسها تبقى في جيبي و صيانتها عند البقال و قطع غيارها بملاليم و ممكن أيعت البواب يجيبهالي مع طلبات البيت
في النهاية دي تجربتي في السوق و ده رأيي المتواضع.. ممكن تتفقي معاه و ممكن مايعجبكيش المهم تاخدي منه اللي يفيدك و كوني من خلاله قرارك الشخصي بعيداً عن أي تأثير خارجي.. و مره تانية ربنا يوفقك
