[saskonn]

انا معايا الميجان والحمد لله انا شايف لحد دلوقتى انها سيارة هايلة بكل المقاييس وانا فضلتها على الاوكتافيا والكورولا وانا بشترى وده بناءا على ركوبى لهذه السيارات و قناعاتى الشخصية. بس مش اى حد يركب الميجان . تماما زى مش اى حد يركب المينى او الفيات 500 او السوبارو او الاودى او الفولفو او الساب. أنا شايف ان الميجان فيها المواصفات دى:
-احلى سيارة فى فئتها مع السيفيك من الخارج والداخل
- أأمن سيارة فى فئتها 5 نجوم
- وسعها معقول جدا جدا من الداخل
- كماليتها اللى موجودة من 4 سنين باقى السيارات بتحاول تقلدها دلوقتى
- مريحة جدا جدا جدا فى السفر
- ثابتة جدا وخاصة على المنحنيات وعلى سرعات كبيرة
-ناعمة جدا
-مثالية فى التعامل مع المطبات
-مصفحة من الاسفل ومزودة بقضبان حماية
- افضل توكيل فى مصر

العربية فيها عيبين:
- متنفعش للشباب الاهوج اللى عايز يوصل لسرعة 200كم/س فى 10 ثوانى وفاكرين نفسهم راكبين عربيات سباق
- لازم يتعملها صيانة دورية منتظمة ومينفعش تروح لعكاشة الميكانيكى او يركبلها قطع غيار من عند بقله بتاع الصينى

الموضوع مش ايه اللى بيتباع فى امريكا ولا ايه اللى مغرق اوروبا ولا ايه اللى بيفضلوه فى الخليج، الموضوع انا فى مصر شايف ايه افضل سيارة تناسبنى واجيبها وبالنسبة لاعادة البيع ممكن تجيب عربية بتتباع بدون خسارة تركنها وتطلع تنام يدخل فيها بلدوزر وهيا راكنة تتباع خردة. اللى بيشترى عربية غير اللى بيشترى شقة او حتة ارض ياريت نفهم ان السيارات سلعة استهلاكية مش استثمار بنسقع فيه فلوسنا. العربية دى مكنة بنسبها فى الشارع ممكن تتخبط او تتسرق او يحصلها اى حاجة ماينفعش واحنا بنشتريها نفكر فى بيعها.

واخيرا لو رجع بيا الزمن ليوم ماشتريتها اكيد اكيد كنت هاشتريها تانى وشكرا