رد: تيل الفرامل خارج الضمان بطولة منصور شيفرولية
أظن الموضوع ده طبيعي حضرتك
ولا يستحق كل هذا الانزعاج
لأن الضمان يكون ضد عيوب الصناعة أصلا
وثانيا إذا حضرتك قرأت شروط الضمان ستجد أن هناك أجزاء لا يسري عليها الضمان
أو يكون ضمانها لمدة أقل من الضمان الشامل للسيارة
يعني مثلا في سيارتي ضمان السيارة 3 سنوات لكن في شروط الضمان أن أجزاء معينة زي المساعدين ضمانها لمدة 6 أشهر أو سنة فقط
الأمر الآخر أنا في توكيل آخر الأسبوع الماضي حدث نفس الأمر معي:
طلبت الكشف على الفرامل فقالي التيل سيحتاج لتغيير بعد حوالي 2000 كيلو يعني يكون عمل 12000 كيلو
فسألته هو الطبيعي بتاعه إنه يعمل قد إيه فقالي 15-20 ألف لكن واضح إن حضرتك بتمشي في أماكن زحمة كتير
وده صحيح فأنا طلبت تغيير التيل في ساعتها (مع العلم إن التيل في حالتي كوري وسعره في التوكيل 550 جنيه) عشان أن باهتم بكل ما له علاقة بأمان السيارة إنه يكون في أحسن حال
وبفضل ربنا بعدها بيومين واحد متهور قطع عليا الطريق ولولا فضل ربنا وإن الفرامل كانت لسه متغيرة كان وارد إني ألبس فيه وبدل ال550 جنيه كنا دخلنا في فيلم تاني خالص
يعني عمر التيل ده بيختلف بحسب طريقة قيادتك وحسب المكان الذي تسير فيه وأغلب شوارع القاهرة فيها زحمة وتوقف متكرر كل أمتار قليلة
فطبيعي إن التيل وأجزاء تانية كتير يكون عمرها أقل من العمر الافتراضي النظري المحدد مثلا بناء على حالة المرور في كوريا مثلا.
وبرضه في حالتي العربية لسه في الضمان لكن التيل مش في الضمان وأظن ده هيكون نفس الوضع في أي عربية في العالم مش في مصر بس. لأن ده أجزاء بيتم استهلاكها وليس للأمر علاقة بعيوب في صناعة السيارة تؤثر على أدائها. يعني المشكلة مثلا مش في الموتور أو الفتيس نتيجة عيب في التصنيع.
وأنصح كل الناس تطلع على شروط الضمان عشان تبقى عارفة إيه بالضبط اللي ليها عند التوكيل وهتلاقي إن حتى في قيود على الحالات اللي الوكيل فيها بيكون عليه إنه يغير لك حاجة في العربية.
وأيضا أنا بعد ما وجدت إني استهلكت التيل أسرع كتير مما هو مفترض له بدأت أغير طريقتي في القيادة وأزيد المسافة بيني وبين من أمامي لتقليل الحاجة لاستخدام الفرامل بصورة متكررة وزيادة عمره معي.
خالص تحياتي
|