[AbOnOrA]

بما ان الحوار حديث الساعة ولان الحوار فى حد ذاتة واحد من اهم الميزات اللى خصنا بيها المولى سبحانة وتعالى عن سائر المخلوقات وبيه قدرنا نوصل لتكوين مجتمعات ومدن وحضارات فانا فكرت اعمل موضوع اعبر بيه عن رائى فى الحوار مع الاخوان عموماً سواء على المستوى الايدولوجى (الفكرى) او السياسى

كمان حبيت انقل ليكم خلاصة نقاشاتى وحواراتى مع اخوة واصدقاء ينتمون للاخوان سواء تنظيمياً او فكرياً يمكن تكون مفيدة لحد

انا هحاول مطولش فى المقدمة وابداء بالاسئله والردود بس فيه كلمتين كمان عايز اقولهم عن الحوار عموماً برضو

اغلب مشاكلنا الحالية تحل بالحوار
لكن المشكلة اننا مفتقدين روح ومقومات الحوار اصلاً
روح الحوار ببساطة هى اللى كانت بتخلينى انا شخصياً اتحاور مع اصدقائى المسيحيين فى الدراسة عن ادق مسائل العقيدة الاسلامية او المسيحية من غير ما حد فينا يجرح فى التانى او ييهينة او يسفه معتقدة
لاننا كنا اصحاب وبنحب بعض كأخوة وكل واحد فينا نفسه فعلاً صاحبه يكون على الطريق الصحيح فكنا بنقدر نتحاور ونفيد بعض وعمرنا ما شتمنا بعض او كرهنا بعض بالعكس مازلت احتفظ بنسخ من الكتاب المقدس والانجايل مهداة من اصدقائى المسيحيين

وصلكو معنى روح الحوار ؟

طيب مقومات الحوار باختصار برضو نقدر نقول انها ثقافة
للاسف مفتقدة بشكل كبير فى مجتمعنا دلوقتى
مفتقدة بداية من الاسرة وافرادها وفى المدارس وفى الجامعات وفى العمل كمان
زمان كانت المدارس فيها انشطة ثقافيه مناظرات وخطابة دلوقتى نظم التعليم وطبيعة العصر خلت الناس اغلبها معلوماتهم ع السريع ونقاشهم ع السريع وبالتالى بيقلبو على بعض ع السريع برضو
فى حين ان الحوار محتاج صبر واحاطة بموضوع الحوار ومداولات وتفكير وطرح او بالبلدى كل ده نختصرة باللى بنقول عليه (الكلام اخد وعطا)
يعنى تسمع اللى قدامك وتفهم عايز يوصلك ايه قبل ما تفكر تقول ايه وتسمعه ايه

لكن الحوار دلوقتى عمال زى (الردح البلدى ) ده يقولى ياللى وياللى والتانى يقولة انتو اللى ياللى وياللى وده يقولة انتو فيكو وفيكو والتانى يرد عليه فيكو وفيكو
اه والله حتى على اعلى المستويات للاسف

على سبيل المثال كنا نلاقى قيادى اخوانى كبير مثلاً حد يقولة انتو محاصرين المحكمة الدستورية يقوم التانى يقولة ما المعارضة محاصرة قصر الاتحادية يقولة انتو بتتعدو على الاعلام والقضاء التانى يقولة مانتو بتتعدو على المشايخ والعلماء وهكذا ده طبعاً مسموش حوار واذا اتسمى حوار فبيتقال عليه حوار الطرشان
لان الطرفين فى الحقيقة مش بيسمعو بعض ولا بيبنو كلامهم على افكار بعض واطروحاتهم لكن مجرد تراشق للكلمات والجمل وما تيسر من الغمز واللمز والاتهامات !!!

مش هطول فى المقدمة ديه اكتر من كدة وان كانت تستحق لكن حبيت احط اطار لمفهوم الحوار اللى حابب اتكلم عنه وادى امثلة ليه فى مشاركاتى الجاية

وطبعاً الدعوة مفتوحة للجميع باختلاف ارائهم للمشاركة (بالحوار) والرأى والعليق