[YahiaAshraf]

المشاركة الأصلية كتبت بواسطة sherifabden معلش يا يحيي انا مختلف معاك شوية دلوقتي مادة زي الجبر مستحيل تتفهم كدا يعني انا فتحت كتاب الرياضه وقريته كله ومفهمتش حاجة لكن في الدرس كل حاجة بتتشرح ولو مفهمتش حاجة المدرس بيعدهالك مرة واتنين ومليون المشكلة الرئيسية في المدرسة نفسها ان الحصة ساعة واحدة والمدرس بيشرح ل50 واحد وبعد ما يخلص شرح بقا ملهوش دعوة اللي فهم واللي مفهمش لان اكيد نص العيال مفهموش فهوا مش هيقعد يشرح لكل واحد مش كسل ولا حاجة بس علشان الوقت مش كفاية دا غير بقا ان في بعض المدرسين مش فاهمين هما بيشرحوا ايه بالضبط وهوا صح ان الفاشل فاشل والناجح ناجح لكن المشكلة انك مثلا في الثانوية عند جبر وهندسة وفيزياء وكيمياء وتاريخ وجغرافيا وانجليزي وفرنساوي الخ الخ الخ مستحيل الواحد يعرف يذاكر دول كلهم مرة واحدة من غير درس دا غير ان كل مادة من دول محتاجة وقت طويل جدا وتعب وقرف طب الحل ايه ؟؟ الحل ان المناهج تتخفف شوية لان مش معقولة ان الواحد بيذاكر 4 شهور وفي ساعتين يحط كل اللي ذاكره في ورقة الامتحات وفي نفس الوقت تتخفف اعداد الطلاب في الفصول لان مش معقول ان المدرس يشرح لميت واحد في الفصل وفي ساعة واحدة وكمان وقت الحصة يزيد شوية لان لو الدروس اتلغت في الحالة دي محدش هينجح وعلى فكرة كمان العيال هيا اللي بتكون عايزة تاخد درس لان والدي مخلنيش اخد درس في كل المواد قالي المادة اللي انتا عايز تاخد فيها درس خد فيها درس

طب كويس ان الحصه ساعه عندكم

ده انا عندى الحصه نص ساعه و لما بتزيد بتبقى ساعه الا ربع

بص يا شريف هقولك على حاجه


انا دلوقتى باخد فى الثانوى المانى الصراحه المدرس فى الفصل بيشرح بما يرضى الله و يعيد و يزيد لغاية لما افهم
وبخلص الحصه و انا متمتع

وكذلك التفاضل و حساب المثلثات و الجبر

يمكن الفيزياء و الميكانيكا و العربى المدرسين اى كلام

بس فيه مدرسين كويسين


ماده زى الفيزياء و العربى ممكن تتذاكر من غير درس


هو المشكله من كل الاطراف
والمشكله الرئيسيه من وزارة التربية و التعليم و المدرسين و العيب التانى على الطالب
ليه بقى العيب التانى على الطالب ؟
اول حاجه اثناء الحصص مسخره و قلة ادب مع المدرسين و بالتالى المدرس مش هيعرف يقول كل اللى عنده و طول الحصه اسكت يا واد و مش عارف ايه و طبعا المدسر ما هيصدق انه ما يشتغلش


ثانيا الطالب بيجرى ورا المدرس ورا الدروس من غير ما المدرس يطلب انى اخد درس
يعنى الطالب نفسه داخل المدرسه كانها فسحه مش داخل يتعلم يعنى بيقضى الروتين اليومى كانه عمل اللى عليه يعنى قاعد فى الحصه مكبر دماغه


معتمد على الدرس اللى بياخده بره


************************* ******

المفروض المناهج كلها من ابتدائى لثانوى تتغير بالكااااااااااامل مش تعديل حتى

ويبقى مناهج تعتعم مع الاساليب التكنولوجى الحديثه
للاسف احنا بنذاكر علشان الامتحان مش علشان تعلية قدرة الاذهان

مثلا مادة الفيزيا انا بذاكرها علشان الامتحان

بس ممكن واحد يفكره و يخترع حاجات من اللى هو درسه

وده الاسلوب العلمى الحديث اللى بتستعمله الدول المتحضره



للاسف نظام الغوغائية و الهمجيه فى التعليم هى اللى مضيعانا


ربنا يصلح الاحوال