[sayed2077]

بص حضرتك لو على طريق مفتوح بسرعه متوسطه 90 كلم / س

والكربراتير مظبوط تمام والكهربا تمام وكل الكلام ده

هتعمل معاك 250 كلم لكل 20 لتر بنزين

اما لو فيه حاجه مش مظبوطه بالظبط المعدل هيقل لغاية 200 كلم لكل 20 لتر بنزين

وعاوز نصيحتى بلاش تغير ف نوع البنزين كتير معاها لانك هتواجه
عاصفه من الدخان الاسود

يعنى انا مثالا بستخدم بنزين 80 وخلينى صريح معاك برضوا البنزين ال 80 مش بيديك الطاقه القصوة للمحرك وعلشان اثبتلك ده جرب حط 80 فتره و جرب طريقه سواقته عامله ازاى ومره واحده والتنك خلاص فاضى فول 92 وشوف الاداء هيبقى عامل ازاى هيختلف 180 درجه هتحس ان فيه بتاع 30 حصان كانوا غايبين عن المحرك مع بنزين 80 بس مع بنزين 92 هتلاقى نفسك راسك براس لانوس وفيرنا وتشد معاهم براحتك خاااالص من غير مجهود بس لو بتحط 80 يبقى احمد اااوى ربنا انك بتحط اللتر بجنية
وبتملى التنك كله ب 45 جنية لان التنك 45 لتر

بس نصيحتى بلاش تتنقل معاها من بنزين لبنزين وعن تجربه
لانى اكتر من مره افضل بستخدم بنزين 80 وبصراحه انا هدفى التوفير وليس الشد والجرى وكدا يعنى عاوزها تمشى براحتها وعلى فكره مع بنزين 80 هتجيب معاك سرعه 120 عادى بس طبعا فى قت اطول وبصراحه كله فى سبيل التوفير يهون

المهم بقى انا كل ما بحط 80 وارجع مثالا افول تفويلة 92 افاجىء بعاصفه من الدخان الاسود اللى بيطلع منا الشكمان و بيبقى حلها انك تنضف الكربراتير عند بتاع الكربراتير انا عن نفسى بتعامل مع الاسطى معتز بصراحه فنان بمعنى الكلمه ولما سألته عن السبب قالى ان نسبة الكربون فى ال 80 عالية وعلى فكره (ديه حاجه علمية فعلا ان كل ما الاوكتان بتاع البنزين ارتفع نسبة الكربون فيه قلت ) المهم قالى ان مع فتره استعمل بنزين 80 كبيرة بيترسب على اجزاء الكربراتير من جوه زى تراب اسود كده وتيجى انت تحط 92 بيكون حامى فبيشيل التراب الاسود ده من على اجزاء الكربراتير من جوه فبيسد مجارى الهوا فى الكربراتير لان مجارى الهوا فى الكربراتير عندنا فيها حاجات صغيرة جدااا قد راس الدبوس فبتتسد من تراب الكربون ده

فالافضل من وجهة نظرى استمر على بنزين 80 على طول وكل 6 شهور تروح تنضف الكربراتير عند متخصص كربراتير ممتاز ولازم يكون ممتاز لان كربراتير الاكسيل يعتبر من الكربراتيرات المعقده شوية
والتنضيف مش هيكلفك 60 جنية مع العلم ان ال 60 جنية دوول هتوفرهم فى تفويلة ونص للتنك بنزين 80

او استخدم 92 على طول وابقى برضوا نضف الكربراتير مره كل سنه ولا حاجه

وبصراحه الاكسيل عربيه ممتازة وقطع غيارها فعلا رخيصه جداااا و معمره

على خلاف ال 128 مثالا

قطع غيارها رخيصه وتعتبر فى نفس اسعار قطع غيار الاكسيل بس مش معمرة خالص والدليل على كده مثالا

كاتينة الاكسيل بتشتريها ب 50 جنية بتقعد معاك 40 الف بالتمام والكمال ان شاء الله

تعالى بقى لكاتينة ال 128 بتشتريها برضوا ب 50 جنية بس لو قعدت معاك لغاية ال 20 الف بيبقى حلو اووى

وقيس على كده حاجات كتتير

وفعلا انا شايف ان الاكسيل تعتبر افضل حاجه فى فئتها وفى سعرها وفى قطع غيارها ووسعها

واى استفسار اسئل ولا يهمك انا الاكسيل طلعت عينى خلاص