رد: تصميم مكتب انيق ومحترم
طالما المكتب ده هو الأوضة الأهم يبقى لازم مستوى التشطيبات يكون أعلى شوية
بالنسبة للقاطوع - الخشب هيبقى مكلف جداً و هيبقى شكله نشاز مع بقية الحوائط العادية و في هذه الحالة لا يعلى على القواطيع الجبسية بسمك 10 سم و يتم ملو الفراغ بالصوف الصخري العازل للصوت لضمان (بعض الخصوصية) حيث لايمكن عزل الصوت بنسبة 100% و يمكن كمان القاطوع الخشب يكون أقل في عزل الصوت - وتكون التكلفة التقريبية للمتر المربع حوالي 100 جنيه للقاطوع الجبس (وشين جبس + الشاسيه + العزل) ويتم تنفيذه بعد الأرضيات و قبل الأسقف.
بالنسبة للأرضيات - يمكن إستعمال أرضيات HPL خد بالك {و ليس HDF } وهذه الأرضيات عبارة عن ألواح خشبية بلون وملمس الخشب الطبيعي يتم تجميعها بدون لزق يعني ممكن تفكها بعد كده و تركبها في أي مكان ثاني و يجب أن تكون برتبة 33 أو أكثر و هي المخصصة للمناطق الإدارية حتى تتحمل الدوس و البهدلة و المتر منها بحوالي 100 جنيه فما فوق (شامل التركيب) للأنواع النضيفة و موجودة في جميع المحلات النضيفة مثل داري في الهرم أو السلاب وخلافه و أنصحك تجيب الألماني نوع كرونوس أو حاجة قريبة منه (أوروبي يعني)ويمكن تركيب شرائح عازلة للصوت والرطوبة أسفلها عشان مزيد من الحماية ولكن أهم حاجة تكون الأرضيات الخشبية رتبة 33 و إلا مش هتستحمل - هي طبعاً أزيد من البورسلين لكن الشكل فرق شاسع و لأن الأرضية بسمك حوالي 9 -12 مم هتحتاج معبرة عشان فرق المنسوب و برضه المتر في حدود 10-15 جنيه تقريباً.
البورسلين طبعاً جميل وشيك و ممكن يبتدي من 50-60 جنيه للأنواع النضيفة ولو عاجب حضرتك أكثر من الـHPL ممكن تركبه بمادة على الأرضيات الموجودة بالفعل بعد تجهيزها كويس (نضافة تامة + ملو أي تسويس أو تكسير) و يتم لصق البورسلين بمواد خاصة موجودة عند شركات سيكا و كيماويات البناء الحديث أو الكيماويات السويسرية - كل اللي هتحتاج تعمله هو معبرة عند مدخل الأوضة عشان رفع المنسوب بقيمة السنتيمتر الفرق بين الأرضية القديمة والبورسلين بعد التركيب و دي برضه موجودة في محلات الديكور بس ما أعرفش بكام.
الوزرات اللي تنفع تركب مع الأرضيات الـHPL بتبقى وزرات MDF (الخشب المفروم يعني ) وعليها ستيكر بشكل قريب من الأرضيات أو وزرات PVC بلاستيك برضه بلون الخشب و دي أسعارها حوالي 10-15 جنيه للمتر الطولي.
البورسلين الوزرات منه فيه بتتقطع من البلاطات بس دي يا باشا لازم تكسر في الحيطة لحد المباني و تلزق بالأسمن و بعدين تقطب عليها (يعني تبيض بالأسمنت الفرق اللي هيكون بينها و بين الحيطة بعد التركيب و في العادة مصنعية المتر الطولي وزرة بيبقى بنفس تكلفة مصنعية المتر المسطح أرضيات من 15-20 جنيه/م.ط.
الأسقف - ده يتوقف على إيه الي إنت عايزه من السقف - يعني لو هتعمل كشافات نيون 60×60 أو أكبر و هتركب سماعات أو خلافه ( في الشغل الكبير بتركب حساسات دخان ورشاشات ميه و خلافه) بس على المستوى العادي لو هتركب كشافات بس يبقى السقف الجبس أو غيره ما لوش لزمة تكلفة على الفاضي إلا لو كان بياض السقف سئ - يبقى السقف الجبس أسرع و أنضف طريقة لكسوة السقف و ده يكلف من 80 -110 جنيه /م2 حسب المساحة وإذا كنت عاوز بيت نور أو بيت ستارة و حسب الإكسسوار اللي وراه (الشاسيه يعني) .
دهانات الحوائط و السقف و القاطوع- بلاستيك قابل للغسيل من نوعية محترمة باكين أو كيماويات البناء أو سكيب و الدهان الأبيض العادي بحوالي 20-30جنيه شامل الخامة لصنايعي نضيف و فيه طريقة أغلى للدهانات (للحوائط و ليس الأسقف)وهي السبونج ( السفنجة يعني) وفكرتها إن الصنايعي بعد ما يشطب الحيطة أبيض بيجيب سفنجة أو فانلة قديمة أو أي حاجة هو بيستعملها و يبتدي (يطبع ) أشكال عشوائية على الحوائط بتديك تشطيب أشيك وبتداري تماماً عيوب الحائط وممكن تكلف من 5 - 15جنيه زيادة على المتر المسطح.
هتحتاج بعد كده كرانيش للسقف و أسرع و أنضف حاجة كرانيش الفيوتك أو اللي شبها و في منها في الرويعي و المتر يختلف حسب المقاس و الإسطمبة و المتوسط حوالي 15-20 جنيه و يكلف تركيبه من 5-10 جنيه بمادة اللزق و حسب الكميات و الميزة الرهيبة النضافة و جودة الخامات و سرعة التركيب -المكتب ممكن يخلص في ساعتين زمن.
الإضاءة لو هتركب سقف جبس يبقى كشافات 60×60 سم أو 60×120 سم من العشماوي في العتبة أو لو عايز حاجة أنضف مصطفى علي جنبهم في شارع رشدي بس ما أعرفش بكام الصراحة و بالمرة و إنت هناك هات أوشاش المفاتيح و البرايز وكام أبليك حلو كده.
أتمنى أكون غطيت أوجه التشطيبات اللي حضرتك ممكن تحتاجها و تحت أمرك في أي إستفسار
|