[mr/medo]

المشاركة الأصلية كتبت بواسطة AHMEDCAR استاذ ميدو الف الف شكرا على كلام حضرتك الجميل ده و بجد انا مبسوط ان فى حد بيحب مهنته بالطريقه دى بس انا هاقول كلمه واحده ابرك من عشره الحاجات اللى حضرتك شايفها كلها انها عادى جدا كده و كويسه انا بصراحه ضميرى لا يملى عليا انى اعملها خالص و دى طبعا بتختلف من شخص للاخر و اخير اكيد طبعا دفعت رشوه بس مش لعسكرى دفعتها فى محكمه علشان اخلص ورق قضيه خاصه بيا انا شخصيا و بعديها انا بجد اتخنقت جدا جدا اليوم ده و حسيت انى عملت بلوه و الحمد لله على كل شيى و من يوميها قولت خلاص انا مش شغال المهنه دى تانى و لانى لما حاولت انى اخلص ورقى من غير الكلام ده لقيت ان كل حاجه وقفت و ليه وجع الدماغ عموما انا متشكر جدا جدا للمناقشه الجميله دى و الاختلاف للرائى لا يفسد للود قضيه

اولا يا استاذ احمد انا لازم اكون بحب مهنتى والا مشتغلهاش اصلا .

ثانيا يا استاذ احمد واضح انى معرفتش اوضح وجهة نظرى لحضرتك كويس . انا مقلتش ان الرشوة وفبركة الاوراق والاجراءات والحاجات دى عادى جدا وجميله وكويسه وعجبانى وانى ببقى مستريح او مبسوط وانا بعملها , بالعكس واقسم بالله انا من اكتر الناس اللى حزين من الوضع اللى احنا وصلناله دا ، وللاسف انه بقى امر واقع وعايز ثورة اداريه علشان تقدر تغير الوضع دا . وعلى فكره عمر ما كان ضميرى مستريح للوضع دا او للحاجات دى وفنفسى اغيرها بس الوضع دا لايمكن يكون اصلاحه امر فردى اوم من شخص واحد او مجموعة اشخاص ، دا عايز حل جزرى وشامل يعنى ببساطه change system .

ويمكن اهتمامى بالموضوع دا اخد اطار بحثى كمان وانا بعمل دراسات عليا وكان ليا بحث فى الادارة لكن طبعا البحث محكوم بحجم معين واطار بحثى محدد ، لايمكن يستوعب المشكله او يدرسها دراسه تحليله مستفيضه ، وحتى لو قدرة تدرس فالمشكله انه هيبقى مجرد افكار فى دماغك او ورق على حبر حبيس الارفف والادراج وملوش اى مكان من التنفيذ او التطبيق على ارض الواقع .


وفى حاجه تانيه عايز انبهك ليها انك حتى لو سيبت المحاماه واشتغلت اى مهنة تانيه ، فا انت اكيد هيبقى ليك شغل فى المحاكم والمصالح الحكومية واكيد برضه هتضطر تدفع علشان تمشى شغلك ، فا انت برده فى نفس الدايره .
وكمان الموضوع دا مش مرتبط بالمحاماه بس لكن كل المهن فيها كدا . وكمان انت مش هتقدر تنفصل عن المجتمع وتقطع كل تعاملاتك الحكوميه والغير حكومية كمان .


وفى نقطه كمان انا حابب اوضحها . انا لما اتكلمت على دفع الفلوس انا طبعا اقصد انك بتدفع علشان تخلص شغلك المشروع اصلا اللى هو حقا فعلا ، انما انك تدفع رشوه علشان تاخد حق مش حقك طبعا الكلام دا مرفوض شكلا وموضوعا ومفيش فى اى عذر او مبرر اطلاقا .


وبالنسبه لقضيه الموظفين والفلوس طبعا دى مشكله كبيره جدا ولها تفاصيل كبيره ومينفعش اناقشها فى مشاركه ، لكن احب اقولك ان الموضوع فيه تداخلات كتير وفى ناس مظلومه وناس مش مظلومه ومختلط فيه الحلال والحرام ومختلط فيه الفساد مع الاضطرار . حاجات كتييييييييييييير اوى صعب انك تنظرلها نظره واحده وتصدر فيها حكم بدون دراسه للموضوع .


وفى كلمه اخيره عايز اوجهه لضمير حضرتك بما انه ضميرك يقظ ولا يقبل الحرام ولا اخذ حقوقك الغير . انت ليه محتفظ بقيدك فى نقابة المحامين مع انك لا تعمل بالمحاماه واكيد انت بتشتغل شغلانه تانيه وانت تعلم جيدا ان قانون المحاماه لا يقبل بذلك ، الا ترى فى ذلك جور على حقوق زملاء اخرين لك . لان حضرتك بتتمتع بمميزات وحقوقك ليست اصلا من حقك !!!!!!!!!!!!!!!!!!!!!!!!! !!!!!!!!!!!!!!!!!!!!!!!!! !!!!!!!



انا عارف انى طولت عليك فى المناقشه وانك زمانك بتقول يارتنى ما فتحت التوبيك دا ، لكن اللى خلانى انقشك هو انى بيعز عليه ان التقطيع فى المهنه ييجى من ولادها ، بجد ببقى حزين لما الاقى محامين بيسيؤا لمهنتهم وبيشوها صورتها قدام الناس ، وكمان علشان متفهمش كلامى غلط ان مش بقول ان المهنة مقدسه وان مفيش فيها غلط لا ، انا قصدى ان لو فى حد عايز ينقد او ينتقد ممارسات المحاماه او المحامين يبقى نقد موضوعى مبنى على اسباب واضحه وعلميه مش مجرد كلام مرسل ، وكمان النقد دا لابد ان يكون داخلى وليس على الملاء لان مينفعش ننشر غسيلنا قدام الناس ، لان دا بيسىء لينا قبل ما بيسىء للمهنة .

وانا اسف كمان مره انى طولت عليك .ويارب اكون عرفت اوصلك وجهة نظرى ، وبرده الاختلاف فى الرأى لا يفسد للود قضية .

وانا سعيد انى لقيت حد خريج حقوق فى المنتدى