[salahabdelnabi]

المشاركة الأصلية كتبت بواسطة AboNoRa اما عن سؤالك يا صلاح باشا فهو بدون تبديل ادوار يجب على القائد ان يتصرف كقائد يسعى لتحقيق هدف اما ان يجتهد وينجزة او يجتهد ويترك الراية لمن بعده ليتم ما بدأه تقدر تقولى هو ايه الهدف اساسا واتحقق منه ايه وبنسعى لايه مستقبلاً ؟؟

وهل السادات كان مش قائد لم يسعى الى تحقيق هدفه فى ظل التركة المثقلة بالهموم والخراب اللى خلفها سلفه الصالح
واذا اجتهد واصاب فله اجران واذا اخطأ فله اجر ........ ومش معنى كده انى بعصم السادات من اى خطأ لانه بشر يصيب ويخطئ لكن خطأه من وجهة نظر البعض ان مرماش البلد فى التهلكة وكان لازم يحارب لاخر جندى مصرى زاى مافى كتير بيطالبو دلوقتى والراجل ظروفه كانت معروفة وكمان كان عارف قدراته كويس فقدر يحقق ياللى عنده اللى يقدر بيه يجيب بقية حقه وحق الباقيين
لكن كانو فين الباقيين ........... وقفو يتفرجو ويشجعو الضربة الحلوة وشكرا على كده وتعيش مصر امنا واختنا وحبيبتنا ........ طب يافرحتى وبعدين
دا واحد زاى القذافى لما عرف بميعاد الحرب من الاذاعة مش من السادات وكان مدينا ست طيارات عمى ماركة فانتوم من اصل 220 طيارة طلعو الضربة الجوية زعل واتامص وخبط برجليه فى الارض وقال مش لاعب انا عايز طياراتى
عاهل الاردن حسين بن زين على رأى عبد الناصر كان الحليف الاول لليهود وكان عايم على وشة الفتة وعلى كل لون يا بتسته والا نسيت هو عمل ايه لما صدام دخل الكويت وربى دقنه وسمى نفسه الشريف حسين عشان يحكم المملكة
ياسر عرفات نفسه وباعترافه هو شخصيا مكنش عايز السادات يحارب قال ايه خايف على الفلسطنين فى فلسطين .... طب ازاى ..... يعنى كان واثق فى قدرات الجيش المصرى انه ممكن يدخل تل ابيب والا كان عايز السادات يفضل يحارب لحد لما اليهود يدخلو مصر ويمسكوه هو الحكم بداله
حافظ الاسد اول لما لقى الضغط جاى عليه خد ديله فى سنانه وقال يفكيك وساب الحرب وجاب ورا وده اللى خلى السادات يطور من هجوم الجيش ومنها حصلت الثغرة
انا باتكلم على اطراف القضية وقتها
اما باقى اخوانا العرب كل اللى عملوه قطعو البترول عن امريكا واوربا للضغط عليهم
ولما اتزنقنا فى بترول ماحدش قالنا خدو بق واحد بله بيه ريكم والشاه ايران هو الى انقذ الموقف
يا عم هاقولك ايه والا ايه والا ايه
كل اللى اقدر اقوله فى النهاية كلمة واحد دكتور فلسطينى احسبه من المخلصين لوجه الله
قالى واحنا بنتناقش فى موضوع القضية الفلسطينية وقبل ما ياسر عرفات يموت
لازم ياسر عرفات يعمل تمثال للسادات وكل يوم الصبح اول لما يصحى يوطى على جزمته ويبوسها ويقوله يارتنى كنت سمعت كلامك
الله يرحمك يا سادات ويرحمك يا جمال عاشو مقهورين وماتو مظلومين من اللى حواليهم واللى بعديهم
وربنا يهدى العاصى والظالم والمفترى وابن الحرام